Toshkentning Chilonzor tumanidagi Muqimiy—Chilonzor ko‘chalari chorrahasida joylashgan ko‘p qavatli uy devorida Cho‘lpon (Abdulhamid Sulaymon o‘g‘li Yunusov) xotirasiga bag‘ishlangan strit-art paydo bo‘ldi. Ushbu ijod namunasi Abdulla Qodiriyning xotirasiga bag‘ishlangan suratning yonginasiga chizilgan. Bu haqda “Daryo” muxbiri xabar bermoqda.
Ko‘cha san’ati namunasini @inkUZart taxallusi bilan ijod qilayotgan ko‘cha rassomi Abdurahmon Umarov chizgan. Qo‘shimcha qilish kerakki, strit-art namunalarining yoniga “To be continued...”, ya’ni “Davomi bor...” yozuvli tablichka ham ilib ketilgan.
Aytish kerakki, ushbu Cho‘lpon surati tushirilgan strit-art namunasining yaratilish jarayonining boshlanishi aks etgan video dastlab bloger Feruzxon Yoqubxo‘jayevning Instagram sahifasida paydo bo‘lgan.
Avvalroq @inkUZart ushbu devorga Abdulla Qodiriyning tasviri va yoniga “Ahvolimiz” nomli g‘azalini tushirgani, Toshkentdagi binolar devorlarini koronavirus pandemiyasi mavzusidagi graffitilar bilan bezayotgani to‘g‘risida xabar berilgandi.
2020-yilning yozida Abdurahmon Umarov Chilonzor tumanidagi dahalarni turli tasvirlar bilan “boyitish” niyatida ekanini ma’lum qilgandi. “Chilonzorni galerеyaga aylantirmoqchiman. Keyin esa boshqa tumanlar, shaharlar, mamlakatlar va qit’alarga o‘taman” degan edi o‘shanda.