Qrimning Yalta shahrida olti soatlik kuchli yomg‘ir tufayli shahardan o‘tuvchi Vodopadnaya daryosi o‘z qirg‘oqlaridan toshib ketdi. Bu haqda Meduza xabar berdi.
Xabarga ko‘ra, Yaltada barcha yo‘llarni va bir nechta ko‘p qavatli uylarni, shuningdek, “Krimenergo” xo‘jalik zonasini suv bosgan, bu esa elektr ta’minotining uzilishi xavfini keltirib chiqaradi.
Yomg‘ir kasalxonalar va boshqa ijtimoiy obyektlarga ta’sir ko‘rsatmagan. Yalta yaqinidagi Foros posyolkasida ichimlik suvi ta’minoti o‘chgan.
Yalta ma’muriyati rahbari Yanina Pavlenko shahar aholisi va sayyohlardan uydan chiqmaslikni so‘radi.
“Hurmatli Yalta aholisi va shahar mehmonlari! Mumkin bo‘lsa, uyda qoling!” — deb yozdi Yalta rahbari Facebook’da.
Yaltaning suv bosgan qismlaridan aholini evakuatsiya qilish boshlandi. 17-iyun oqshomida shaharga 42 mm yog‘ingarchilik tushgan. Qrim Gidrometeorologiya markazi ma’lum qilishicha, mintaqaning Ay-Petri tog‘ zonasiga 84 mm yomg‘ir yog‘gan, bu bir oylik yog‘ingarchilik me’yori (72 mm)dan ham ko‘p.
Sinoptiklarning xabar qilishicha, yomg‘ir 18-iyun kuni ham davom etadi, dam olish kunlari esa pasayadi va janubda atmosfera bosimi ko‘tarila boshlaydi.
Eslatib o‘tamiz, Rossiyaning janubiy hududlari, xususan, Kerchda 16—17-iyun kunlari yog‘gan tropik yomg‘ir tufayli uylarni suv bosgan edi. Kuchli yomg‘ir, shuningdek, elektr energiyasi va transport harakatining uzilishiga olib kelgan.
Izoh (0)