O‘zbekistonda YuNESKO bilan hamkorlikda madaniy meros masalalari bo‘yicha Xalqaro maslahat qo‘mitasi tashkil etildi

O‘zbekiston Vazirlar Mahkamasi qarori bilan O‘zbekistonda YuNESKO bilan hamkorlikda madaniy meros masalalari bo‘yicha Xalqaro maslahat qo‘mitasi tashkil etildi, deb xabar bermoqda “Dunyo” AA.

Hujjatda O‘zbekiston Prezidentining “Madaniyat va san’at sohasining jamiyat hayotidagi o‘rni va ta’sirini yanada oshirish chora-tadbirlari to‘g‘risida”gi farmoni ijrosini ta’minlash, shuningdek, madaniy merosni muhofaza qilish, asrash, ommalashtirish va ulardan oqilona foydalanishda O‘zbekiston va YuNESKO o‘rtasidagi aloqalarni yanada rivojlantirish vazifalari belgilangan.

Qo‘mita faoliyatining asosiy vazifalari jahon madaniyatiga munosib hissa qo‘shgan O‘zbekistonning madaniy merosini Umumjahon merosi ro‘yxatiga kiritish bo‘yicha takliflar tayyorlash va bu borada xalqaro tashkilotlar va YuNESKO maslahatlashuv organlari (IKOMOS, IKKROM) bilan hamkorlikni kengaytirishdan iborat.

Bundan tashqari, maslahat qo‘mitasi moddiy madaniy meros obyektlari va Umumjahon merosi ro‘yxatiga kiritilgan hududlar (obyektlar) muhofazasini kuchaytirish, ularning umumbashariy bemisl qimmatini ishonchli saqlab qolish bo‘yicha ilmiy va amaliy takliflar tayyorlash, tegishli loyihalarni amalga oshirish bilan bog‘liq ishlarda qatnashadi.

Xalqaro maslahat qo‘mitasi YuNESKO Umumjahon merosi qo‘mitasi qarorlari va tavsiyalarining O‘zbekistonda samarali amalga oshirilishida ishtirok etish hamda bu boradagi milliy hisobotlar tayyorlashda ham amaliy yordam ko‘rsatadi.

Hukumat qarori bilan Xalqaro maslahat qo‘mitasiga moddiy madaniy meros masalalari hamda Umumjahon merosi ro‘yxatiga kiritilgan hududlar (obyektlar) bo‘yicha maslahat organi maqomi berildi.

Qo‘mita faoliyati xarajatlari O‘zbekiston davlat budjetining Turizm va sport vazirligi huzuridagi Madaniy meros agentligiga taqsimlanadigan mablag‘lari doirasida moliyalashtirilishi nazarda tutilgan.

Avvalroq O‘zbekistonda madaniy meros muhofazasi kuchaytirilishi, Xalqaro ekspeditsiya Qoraqalpog‘istonning tarixiy yodgorliklarini o‘rganib, ularni YuNESKO butunjahon madaniy merosi ro‘yxatiga kiritish strategiyasini ishlab chiqishi haqida xabar berilgan edi.