Hozirgi kunda Andijondagi mahallalarning aksariyati o‘zining “o‘sish nuqta”larini aniqlab olgan bo‘lishiga qaramay, 100 ta mahalla haligacha o‘z ixtisoslashuv yo‘lini topmagan. Bu haqda ayni paytda Prezident Shavkat Mirziyoyev raisligida viloyat faollari bilan o‘tkazilayotgan yig‘ilishda davlat rahbari so‘z yuritdi, deya xabar bermoqda “Daryo” muxbiri.
“Men bugun viloyat aholisining halol mehnatlari bilan yaqindan tanishish, sizlar bilan viloyatning bugungi va ertangi taraqqiyoti haqida fikrlashib, birgalikda ulkan rejalar tuzish uchun keldim. Ayniqsa, viloyat rivojiga kuchli turtki beradigan yangi ‘o‘sish nuqta’larini shakllantirish va to‘liq ishga solish, aholi hayotini yaxshilash bo‘yicha asosiy yo‘nalish va vazifalarni belgilab olsak, ayni muddao bo‘ladi”, — deydi davlat rahbari.
Prezident “mahallabay” va “xonadonbay” ishlash asosida oilaviy tadbirkorlikni rivojlantirish bo‘yicha Andijon namunasini yaratib, shu orqali viloyatni ishsizlik va kambag‘allikdan xoli hududga aylantirish zarurligini qayd etgan.
“Bu borada viloyatga yuborilgan ishchi guruh tomonidan jami 882 ta mahalladagi muammolar va imkoniyatlar o‘rganildi. Bunda, har bir mahallada aholining azaldan shakllangan mehnat ko‘nikmasidan kelib chiqib, eng samarali ‘o‘sish nuqta’lari sifatida – hunarmandchilik, tomorqa va issiqxona xo‘jaligi, bog‘dorchilik, gulchilik, parrandachilik kabi yo‘nalishlar belgilab olindi. Masalan, Shahrixon tumani, ‘Yuzlar’ mahallasida 847 ta xonadondan 721 tasida 1 sotixdan 30 sotixgacha issiqxonalar mavjud. Izboskan tumani, ‘Gudur’ mahallasidagi 601 ta xonadondan 265 tasi savat yasash bilan shug‘ullanadi.
Har bir tuman (shahar)ga biriktirilgan vazirlik va xo‘jalik birlashmalari, banklar hamda sektor rahbarlari ‘mahallabay’ ishlash asosida, aholi muammolarini hal etish va tadbirkorlikni rivojlantirish uchun shaxsan mas’ul bo‘ladilar. Bu ishlardan ko‘zlangan pirovard maqsad – aholi bandligi va daromadini oshirib, viloyatda kambag‘allikni yo‘qotishga erishishdir.
Hozirgi kunda viloyatdagi mahallalarning aksariyati o‘zining ‘o‘sish nuqta’larini aniqlab olgan bo‘lishiga qaramay, 100 ta mahalla haligacha o‘z ixtisoslashuv yo‘lini topmagan. Shu bois, 200 ta mahallani rivojlantirishga viloyat hokimligi va iqtisodiy kompleks mas’ul bo‘ladi”, — deydi davlat rahbari.
Avvalroq Shavkat Mirziyoyev Andijonga tashrifini Izboskandagi to‘qimachilik korxonasini borib ko‘rgani, Andijonda metall konstruksiyalar korxonasi tashkil etishga ko‘rsatma bergani hamda Izboskan tumanidagi “Rustamjon Zamin rivoji” fermer xo‘jaligi dalasida g‘alla hosilini ko‘rgani haqida xabar berilgandi.
Izoh (0)