Telegram messenjerida “Ichki ishlar xodimlari bolali ayolga vahshiylarcha kuch ishlatdi” sarlavhasi ostida video tarqaldi. Тoshkent shahar IIBB holat bo‘yicha izoh berdi.
Qayd etilishicha, 2021-yil 16-iyun kuni soat 10:30 atrofida Yunusobod tumani Amir Temur ko‘chasida Toshkent shahar IIBB patrul-post xizmati xodimlari Erjan Jiyanbekov va katta serjant Mansur Oripov tilanchilik bilan shug‘ullanib, fuqarolarning rahmini keltirish maqsadida go‘daklardan foydalanayotgan bir nechta ayollarni ko‘rib qolgan. Shu bilan birga, ayollar o‘zlarining va farzandlarining hayotlarini jiddiy xavf-xatarga qo‘yib, avtomobil harakati yo‘liga chiqqan.
Fuqarolarning shaxslarini aniqlash uchun ular ichki ishlar bo‘limiga taklif qilingan, ammo ulardan biri javobgarlikdan qochish uchun baqirishga, qarshilik ko‘rsatishga kirishib, atrofdagilarning e’tiborini jalb qilishga harakat qilgan.
“E’tibor bering, tarmoqda tarqatilayotgan videoda holat to‘liq ko‘rsatilmasdan, balandparvoz sarlavha qo‘yilgan, xolos. Bu orqali huquqni muhofaza qilish organlarining tilanchilik bilan shug‘ullanadigan odamlarning ‘qurollariga’ aylangan voyaga yetmaganlarni himoya qilish yo‘nalishidagi faoliyatlari haqida noto‘g‘ri tasavvur hosil bo‘lishi mumkin”, – deyiladi IIV xabarida.
Ta’kidlanishicha, videodagi ayolning shaxsi aniqlanganda (M.X. ekani ma’lum bo‘ldi), u bilan bir necha bor profilaktik suhbatlar o‘tkazilgani aniqlandi. Fuqaro ilgari ham tilanchilik uchun ma’muriy va jinoiy javobgarlik ko‘zda tutilgani haqida ogohlantirilgan.
“Suhbatlar davomida unga bir necha bor ishga joylashishda yordam taklif qilingan, ammo u halol mehnat qilishning o‘rniga jazirama issiqda farzandini qiynab tilanchilik qilish yo‘lini tanladi.
Hurmatli blogerlar! Balandparvoz sarlavhalar yozishdan oldin, go‘daklarning hayoti haqida o‘ylab ko‘ring: bunday holatlarda qonunbuzarlarga qarshi qonuniy choralar qo‘llanilishiga qarshi bo‘lish to‘g‘rimi?”, – deya yakunlanadi IIV xabari.
Bundan avval Buxoroda 17 yil avval xizmatga noloyiqligi sabab ishdan bo‘shatilgan IIB xodimi soxta guvohnoma bilan ushlangani, Kattaqo‘rg‘ondagi DSI xodimi o‘limi bilan bog‘liq holat Senat tomonidan nazoratga olingani hamda Buxorodagi xalqaro avtomobil yo‘lida qarovsiz qoldirilgan qizaloq YPX inspektori yordami bilan onasiga qaytarilgani haqida xabar qilingandi.
Izoh (0)