Chevrolet modellari Rossiya bozoriga qaytganiga bir yil to‘lib, avtomobil ishlab chiqaruvchi mamlakatda sotilgan mashinalar statistikasi bilan bo‘lishdi, deb xabar beradi Motor. Aniqlanishicha, 2020-yilda mamlakatda hamyonbop mashinalar savdosi bilan shug‘ullanuvchi Chevrolet avtosalonlari 2 tani tashkil etgan bo‘lsa, hozirda ularning soni 45 taga yetgan. Bir yil davomida rossiyaliklar 2840 dona Chevrolet avtomobillarini xarid qilgan.
Foto: UzAuto Motors
2020-yilda Rossiyada koronavirus pandemiyasi sabab Chevrolet’ning faqatgina ikkita avtosaloni faoliyat yuritgan bo‘lib, u yerda Spark, Nexia va Cobalt sotilgan. 2021-yilning yoziga kelib mamlakatdagi yettita federal okrugning 37 ta shahridagi salonlar ish boshlagan.
Nexia va Cobalt avtomobillari Rossiyaga Asakada ishlab chiqarilgan yirik uzelli ehtiyot qismlardan foydalanuvchi Qozog‘istonning “SariarkaAvtoProm” zavodi tomonidan yetkazib berilmoqda. O‘z navbatida Spark UzAuto Motors korxonasining o‘zidan yetkaziladi. Rossiyaliklar orasida eng talabgir modellar qatoriga Chevrolet Cobalt yetakchilik qilmoqda — bir yilda ushbu modeldan 1788 nusxa sotilgan bo‘lib, bu jami sotilgan avtomobillarning 63 foizini tashkil etadi. Nexia esa savdolarning 29 foizini (837 ta) egallagan bo‘lsa, A-klassga kiruvchi Spark xetchbekidan 215 nusxa sotilgan.
Ma’lumot uchun, Chevroletning hamyonbop modellari Rossiyada 2018-yilga qadar Ravon brendi ostida sotilgan, biroq 2018-yilning bahoridan 2019-yilning kuziga qadar Ravon’larni yetakazib berish amalga oshirilmagan.
UzAuto Motors — Chevrolet’ning Rossiyadagi ikkita distribyutoridan biri hisoblanib, hamyonbop mashinalarni yetkazib berish uning nazorati ostida. Ikkinchi distribyutor — bu “Jeneral Motors Rossiya” bo‘lib, u Traverse va Tahoe kabi Amerika modellarini yetkazib berish bilan shug‘ullanadi.
Avvalroq Tojikistonda UzAuto Motors avtomobillarini yig‘ish yo‘lga qo‘yilishi, O‘zbekistonda sotuvdan olingan Equinox modelini Qozog‘istonda sotish boshlangani to‘g‘risida xabar berilgandi.
