Xitoy hukumati may oyida bo‘lib o‘tgan marafonda 21 nafar yuguruvchining o‘limiga sababchi bo‘lgan 27 nafar hukumat darajasidagi amaldorlarga javobgarlik choralarini ko‘rdi, deya xabar bergan BBC News.
Poygalar o‘tkazilgan Szintay hududi rahbari o‘z lavozimidan ozod qilindi. Mahalliy shahar meri va Bayin shahrining kommunistik partiyasi rahbariga nisbatan ham intizomiy jazo choralari ko‘rilgan. Boshqa amaldorlarga ogohlantirishlar va xizmatga behurmatlik bo‘yicha baholash xulosalari berilgan. Marafonni tashkillashtirgan kompaniya egasi Chjan Syaoyan qamoqqa olingan va unga nisbatan jinoiy ayblov e’lon qilingan.
11-iyundan boshlab Xitoyda to‘liq nazoratga ega bo‘lmagan, qoidalar va xavfsizlik standartlariga javob bermaydigan har qanday sport tadbirlari bekor qilingan.
Gansu provinsiyasidagi ultramarafonda ishtirok etgan sportchilarga kuchli dovul, muzli yomg‘ir va haroratning keskin pasayib ketishi oqibatida talafot yetgan. Davlat OAVlarning xabar qilishicha, bir nechta sportchi qattiq sovuqda qolib ketish oqibatida vafot etgan. Marafon muddatidan ilgari to‘xtatilgan. Hukumat maxsus qutqaruv operatsiyasini amalga oshirgan. Poygada jami 172 nafar odam ishtirok etgan.
Voqealardan keyin halok bo‘lganlarning qarindoshlari mahalliy hukumatlardagi amaldor tomonidan bosimga uchragani, ularga fojiaviy holatlar haqida gapirmaslik aytilganini ma’lum qilgan.
Eslatib o‘tamiz, may oyida Xitoyning Yunnan provinsiyasida 5,6 balldan 6,4 ballgacha bo‘lgan yer silkinishlari sodir bo‘lgan, shuningdek 1-iyunda Xeylunszyan provinsiyasining Shanchji shahriga tornado yopirilib, 150 ga yaqin uyga zarar yetkazgan.
Izoh (0)