9-iyun kuni Samarqand xalqaro aeroportida Air Astana aviakompaniyasining Olmaota—Samarqand—Olmaota yo‘nalishidagi birinchi aviaqatnovi yo‘lovchilarini kutib olish marosimi bo‘lib o‘tdi. Bu haqda Uzbekistan Airports AJ matbuot xizmati xabar berdi.

Foto: Uzbekistan Airports

Qozog‘istonning Olmaota shahridan KS121 raqami ostidagi reys bilan uchgan Airbus A321 rusumli samolyot Toshkent vaqti bilan 16:15 da Samarqand xalqaro aeroportiga kelib qo‘ngan. An’anaga muvofiq, havo kemasi o‘t o‘chirish mashinalari yordamida hosil qilingan sun’iy suv arkasi tagidan o‘tib, to‘xtash joyiga kelgan.

Tadbirda Qozog‘istonning Samarqanddagi Bosh konsulxonasi va Air Astana aviakompaniyasi vakillari, Samarqand viloyati hokimligi, viloyat turizm va sport boshqarmasi mas’ullari, jurnalistlar ishtirok etgan.

Foto: Uzbekistan Airports

Unda Qozog‘istonning Samarqanddagi konsuli Arsen Abdrahmanov va viloyat hokimi o‘rinbosari, turizm va sport boshqarmasi boshlig‘i Botir Nurullayev ishtirokida ramziy yo‘l lentasini kesish marosimi bo‘lib o‘tgan. So‘zga chiqqanlar yangi aviayo‘nalish ikki davlat va qardosh xalqlar o‘rtasidagi do‘stona munosabatlarni yanada mustahkamlab, turizm sohasini rivojlantirishga xizmat qilishini ta’kidlagan. Shundan so‘ng tadbir tashkilotchilari tomonidan havo kemasi ekipajiga esdalik sovg‘alar topshirilgan.

Ma’lumot uchun, 2021-yil 8-iyun kuni Uzbekistan Airways AJ tomonidan Samarqand—Olmaota—Samarqand yo‘nalishida yo‘lga qo‘yilgan aviaqatnovning birinchisi amalga oshirilgan edi. Milliy aviakompaniya tomonidan Qozog‘istonga haftaning har seshanba va shanba kunlari parvoz amalga oshirilmoqda. Air Astana aviakompaniyasi esa haftaning har chorshanba va yakshanba kunlari o‘z reyslarini amalga oshirishni rejalashtirgan.

Shuningdek, Transport vazirligining ma’lum qilishicha, 11-iyun kuni Turkish Airlines aviakompaniyasiga tegishli samolyot Istanbuldan Urganchga ilk parvozni amalga oshirgan.

Foto: Transport vazirligi

Ma’lum qilinishicha, soat 07:50 da “Turk havo yo‘llari” aviakompaniyasining Airbus A-320 havo kemasi Urganch xalqaro aeroportiga kelib qo‘ngan. Avaiakompaniyaning Istanbul—Urganch— Istanbul yo‘nalishi bo‘yicha ilk parvozi tantali ravishda kutib olingan. Ushbu yo‘nalishda parvozlar haftada bir marotaba, juma kuni amalga oshiriladi.

Foto: Transport vazirligi

Eslatib o‘tamiz, Turkish Airlines aviakompaniyasi 8-iyun kuni Istanbul—Farg‘ona—Istanbul yo‘nalishida ham ilk qatnovni amalga oshirgan edi. Ushbu yo‘nalishdagi aviaqatnovlar haftaning har seshanba va juma kunlari amalga oshiriladi.