O‘zbekiston Qirg‘izistonning Botken viloyatidagi Samarqandek hamda viloyatning Leykek tumanidagi Marg‘un qishloqlarida maktablar quradi. Bu haqda Botken viloyati Vazirlar Mahkamasi vakolatxonasi matbuot kotibi Azatbek Qurbonbekovga tayanib, Kloop nashri xabar berdi.

Foto: Kabar

Qurbonbekovning ma’lum qilishicha, 7-iyun kuni Farg‘ona viloyati hokimi Xayrullo Bozorov boshchiligidagi O‘zbekiston delegatsiyasi ish safari davomida Botken viloyatining Qadamjoy shahriga tashrif buyurgan. Qo‘shni mamlakatdan kelgan mehmonlarni Botken viloyati rahbari Abdikarim Alimboyev kutib olgan va tomonlar o‘zaro munosabatlarni yaxshilashga kelishib olgan.

Matbuot kotibining ta’kidlashicha, O‘zbekiston delegatsiyasi Samarqandek va Marg‘un qishloqlari aholisi va maktab o‘qituvchilari bilan uchrashgan, shuningdek, ular kelajakdagi yangi maktablar quriladigan joylar bilan tanishgan.

“Samarqandek shahridagi Sagin Kojobayev nomidagi maktab-internat yonida 400 o‘rinli yangi maktab quriladi. Chunki ushbu muassasa 1951-yilda qurilgan va hozirda eskirgan. Marg‘un qishlog‘idagi M.Baetov nomidagi o‘rta maktab ham ta’mirga muhtoj, bino ancha eski. U yerda 300 o‘rinli yangi maktab quriladi”, — deydi Qurbonbekov.

Viloyat ma’muriyati maktablar 2021-yilda — yangi o‘quv yiliga qadar foydalanishga topshirilishi haqida ma’lum qilgan.

Avvalroq Shavkat Mirziyoyev va Emomali Rahmon Samarqand va Xatlon viloyatlarida qurilgan ijtimoiy obyektlarning ochilish marosimida ishtirok etgani to‘g‘risida xabar berilgandi. Xatlon viloyatining Ko‘bodiyon tumanidagi tibbiyot majmuasi O‘zbekiston tomonidan qurilgan. Ushbu 250 o‘rinli zamonaviy ko‘p tarmoqli shifoxona yiliga 75 ming nafar bemorga xizmat ko‘rsatish imkoniyatiga ega. Majmuada jarrohlik, urologiya, ko‘z xastaliklari, intensiv davolash va reanimatsiya, pediatriya, travmatologiya, ginekologiya, homiladorlik patologiyasi, tug‘ruqdan keyingi tiklanish va terapiya bo‘linmalari mavjud. Tojikiston tomonidan Samarqand viloyatining Urgut tumanida umumta’lim maktabi barpo etilgan. U 640 nafar o‘quvchiga mo‘ljallangan.