Janubiy Kaliforniya aholisi tovuslar hujumi ostida qoldi. Pandemiya vaqtida qushlar populyatsiyasi ortib ketgan va endi ularning yuzlab turlari Los-Anjeles shimoli-sharqidagi shaharlarda tentirab yuribdi, deb xabar beradi “Korrespondent.net”.
Foto: Getty Images
Ta’kidlanishicha, tovuslar to‘da-to‘da bo‘lib harakatlanmoqda, tomlarga qo‘nmoqda yoki trotuarlar bo‘ylab sayr qilmoqda. Bundan tashqari, ular shovqin solib, bog‘ o‘simliklarini yakson qilmoqda, “cherepitsa”larni o‘yib tashlayapti va avtoturargohdagi mashinalarda o‘z aksini ko‘rib, cho‘qib tashlamoqda.
“Tong otishi bilan meni uyg‘otmoqda. Ular xuddi azobga solinayotgan chaqaloqlar kabi ingraydi, chinqiriqlari esa juda katta mikrofon orqali translyatsiya qilinayotgandek”, — deydi Sharqiy Pasadenada istiqomat qiluvchi 68 yoshli Keylin Tattl.
Los-Anjeles okrugining kuzatuv kengashi qushlarni oziqlantirishga 1000 dollar miqdorida jarima yoki olti oygacha qamoq jazosini joriy etishni rejalashtirmoqda.
Turar joy binolaridagi qishlarni tutib, tabiat qo‘riqxonalariga ko‘chirish bilan shug‘ullanuvchi kompaniyaning egasi, yovvoyi tabiat bo‘yicha ekspert Maykl Maksining so‘zlariga ko‘ra, tovuslar bilan bog‘liq holat juda ziddiyatli. Uning so‘zlariga ko‘ra, aholining 70 foizi ularni yomon ko‘radi va ulardan qutilish niyatida, 30 foizi esa patqanotlilarning qo‘shnichiligiga qarshi emas.
Eslatib o‘tamiz, 2018-yilda tovuslar Kanada shaharlarini “vayron qilayotgani” to‘g‘risida xabar berilgandi. Surrey shahrida joylashgan Sallivan-Xayts hududida tabiiy dushmanlarning yo‘qolib ketgani va oziq-ovqat mahsulotlarining ko‘paygani qushlar populyatsiyasini oshirib yuborgan va bu yerda tovuslar kattagina muammolarni keltirib chiqara boshlagan.
