Namangan viloyatining Kosonsoy tumanidagi “Jar” mahallasida yashovchi 14 yashar Muhammadsodiq Abduxalilov uyida tashkil etilgan ustaxonada mini traktorlar tayyorlamoqda. Bu haqda “Daryo” muxbiri Azizbek Abduvaliyev xabar berdi.

Foto: “Daryo” / Rustamxon Temirov

Muhammadsodiq tumandagi 54-umumta’lim maktabining 8-sinfiga o‘tdi. Fizika va matematika fanlariga qiziqishi baland, 5 yildan beri sportning karate turi bilan shug‘ullanadi. Darsdan bo‘sh paytlarida uyidagi ustaxonada dadasiga ko‘maklashadi.

Foto: “Daryo” / Rustamxon Temirov

Umarjon Yo‘ldoshevning asli kasbi naqqoshlik, hozir tumandagi obodonlashtirish korxonasida mehnat qiladi. Uch o‘g‘il va bir qizning otasi. Muhammadsodiq farzandlarning ikkinchisi.

Foto: “Daryo” / Rustamxon Temirov

“Texnikaga, ixtirochilikka qiziqish bizga otamizdan o‘tgan. Dadam Abduxalil Yo‘ldoshev traktorchi bo‘lgan, hozir nafaqadalar. O‘sha ishlab yurgan paytlari hatto kombayn ham ixtiro qilgan ekanlar, afsuski, qurilmalari saqlanib qolmagan. Bundan ikki yil avval mini traktorlar tayyorlashga kirishdim. Birinchisini tayyorlash uchun naq 9 oy vaqt ketgan bo‘lsa, hozir ota-bola ikkimiz uzog‘i 20 kunda buning uddasidan chiqyapmiz”, — deydi Umarjon Yo‘ldoshev.

Foto: “Daryo” / Rustamxon Temirov

Yo‘ldoshevlar hozirgacha 9 ta traktorni tayyorlab, 8 tasini sotishga ham ulgurishdi. Mashinalarning narxi ot kuchiga qarab 17 milliondan 20 million so‘mgacha. 15, 20 va 25 ot kuchiga ega traktorlar 6 xil funksiya, jumladan, yer ag‘darish, chopiq va haydov kabi qishloq xo‘jaligi yumushlarini bajara oladi. Yonilg‘i xarajati kam, soatiga 0,5-1 litr atrofida benzin sarflanadi.

Foto: “Daryo” / Rustamxon Temirov

Traktorlarni vodiy viloyatlari fermerlari xarid qilmoqda, oxirgisini Toshkent viloyatining Parkent tumanidan kelib olib ketishibdi. Yo‘ldoshevlarga har bir mashinadan o‘rtacha 3-4 million so‘m daromad qoladi. Qolaversa, oilaning 2 sotix atrofida limonariysi ham bor. Bu yerdagi 30 tup limon shu yil hosilga kirdi.

Foto: “Daryo” / Rustamxon Temirov

“Katta o‘g‘lim Nurmuhammad ham avtomobillarga qiziqadi, hozir avtoservisda ishlayapti. Dadam 35 yil traktor haydab, bizga shu qiziqishni yuqtirganlar, shekilli. Topgan daromadimizdan yaqinda u kishiga Spark avtomobili sovg‘a qildik. Mashinalarimizga hali nom qo‘yganimizcha yo‘q. O‘zimcha O‘KT, ya’ni ‘O‘zbekistonning kichkintoy traktori’ degan nomni o‘ylab yuribman”, — deydi Umarjon Yo‘ldoshev.

Foto: “Daryo” / Rustamxon Temirov

Muhammadsodiq maktabni tamomlaganidan so‘ng avtomobilsozlik sohasida oliy o‘quv yurtiga o‘qishga kirmoqchi. Sportda chempion bo‘lib, mamlakatga dovruq taratish niyati ham yo‘q emas. Hozircha esa otasining ko‘magida mini traktorlar yig‘ish va ularni sinovdan o‘tkazish bilan band.

Foto: “Daryo” / Rustamxon Temirov