Dunyo bo‘yicha koronavirusga chalinganlar soni 173 639 206 kishiga yetdi, virus oqibatidagi o‘limlar esa 3 737 447 tani tashkil qilmoqda. Bu haqda Jons Hopkins universiteti ma’lumotlari darak bermoqda. Kasallanish holatlarining ko‘pligi bo‘yicha AQSh (33,3 million), Hindiston (28,9 million), Braziliya (16,9 million), Fransiya (5,7 million) va Turkiya (5,2 million) yetakchilik qilmoqda.
Tibbiy xodimlar jamoasi Hindiston shimolidagi fermerlarni koronavirusga qarshi emlamoqda
Foto: Getty Images
Dunyoda koronavirus bilan kasallanish darajasi pasaydi
Dunyoda koronavirusga chalinish holatlarining soni ketma-ket olti haftadan buyon pasaymoqda. Bu haqda Jahon sog‘liqni saqlash tashkiloti (JSST) bosh direktori Tedros Gebreyesus ma’lum qildi. COVID-19 oqibatidagi o‘limlar esa besh haftadan buyon kamaymoqda.
Shu bilan birga, Gebreyesus ogohlantirishicha, agar cheklovlar juda erta olib tashlanadigan bo‘lsa, koronavirusning yangi shtammlari vaksina olmaganlar uchun xavf tug‘dirishi mumkin.
Pandemiyani yengish yo‘li ma’lum qilindi
Jahon sog‘liqni saqlash tashkiloti (JSST) koronavirus pandemiyasi ustidan g‘alaba qozonish shartini aytdi. JSSTning favqulodda vaziyatlar dasturi direktori Maykl Rayanning aytishicha, sayyoradagi odamlarning kamida 80 foizi emlangan taqdirdagina koronavirus yuqishi xavfini kamaytirish mumkin. Uning so‘zlariga ko‘ra, keng qamrovli vaksinatsiya COVID-19 pandemiyasi doirasida juda muhimdir.
Ekspertning aniqlik kiritishicha, ushbu qoida kasallanganlar soni past bo‘lgan mamlakatlarga ham, kasallanish darajasi yuqori bo‘lganlariga ham bir xilda tegishlidir. Rayan birinchi bo‘lib ochilish juda qiyin ekanini aytdi, chunki kasallik boshqa mamlakatlardan ko‘chib o‘tishi mumkin, oqibatda esa kasallikning yana avj olishi ehtimoli yo‘q emas.
Mavzuga doir: Koronavirus pandemiyasiga qarshi eng samarali kurash olib borayotgan davlatlar reytingi tuzildi
Nyu-Yorkda pandemiyaning tugashi katta konsert bilan nishonlanadi
Avgust oyida Nyu-Yorkdagi Markaziy xiyobonda koronavirus pandemiyasining tugashiga bag‘ishlangan katta konsert bo‘lib o‘tadi.
Shahar meri Bill de Blazio 21-avgustdagi musiqiy shouga 60 mingdan ortiq odamni taklif qilishni rejalashtirmoqda. Hozircha konsertda kimlar chiqish qilishi rasman ma’lum qilingani yo‘q.
“Konsert vatanga qaytish haftaligining bir qismiga aylanadi. U Nyu-Yorkning odatiy hayotga qaytishini namoyon qiladi. Ushbu konsert aholimiz va boshqa hududlarning bizning shaharga anchadan buyon kelmagan aholisi uchun o‘ziga xos imkoniyat bo‘ladi”, — deya qayd etdi mer.
Maydon ikkita — emlanganlar va emlanmaganlar uchun zonalarga bo‘linishi aytilmoqda. Chiptalarning qariyb 70 foizi birinchi guruhga sotiladi.
