Nigeriya adliya vaziri va bosh prokurori Abubakar Malami Twitter’dan foydalanish taqiqini buzganlarni javobgarlikka tortishni buyurdi. Bu haqda Nigeriyaning Daily Post nashriga tayanib “RBK” xabar berdi.
Vazirlik matbuot xizmati xabar berishicha, prokuratura Aloqa vazirligi va unga aloqador boshqa idoralar bilan bog‘lanib, zudlik bilan qonunbuzarlarni javobgarlikka tortishi kerakligini aytgan.
Daily Post nashrining yozishicha, Twitter blokirovkasi kuchga kirgandan so‘ng ko‘plab nigeriyaliklar taqiqni chetlab o‘tish uchun VPN’lardan foydalanishni boshlagan.
4-iyun kuni Axborot va madaniyat vazirligi hukumat mamlakat ichkarisida Twitter’dan foydalanishni taqiqlagani haqida xabar berdi. Vazirlik, shuningdek, ushbu platformadan muntazam ravishda Nigeriya hayotiga putur yetkazuvchi harakatlar uchun foydalanib kelinganini ta’kidladi.
Vazirlik rahbari o‘z navbatida Twitter’ni ikki tomonlama standartlarda aybladi va Nigeriyadagi ijtimoiy tarmoqning missiyasi “juda shubhali” ekanini aytdi.
Twitter’dan foydalanish taqiqi e’lon qilinishidan ikki kun avval ijtimoiy tarmoq Nigeriya prezidenti Muhammad Buxoriy mintaqaning infratuzilmasiga hujumlar uchun javobgar deb hisoblagan mamlakat janubi-sharqidagi ayirmachilar haqidagi tvitini o‘chirib yuborgan edi.
“Bugungi kunda o‘zini yomon tutayotganlarning aksariyati Nigeriyadagi fuqarolar urushi paytida yuz bergan vayronagarchiliklar va halok bo‘lganlar haqida bilishga juda yoshlik qiladi. 30 oyni dalada o‘tkazib, urushdan omon qolganlar bilan ular tushunadigan tilda gaplashiladi”, — deb yozgan prezident 1960-yillarning oxirlarida Biafra Respublikasi mustaqilligi uchun kechgan etnik fuqarolar urushini nazarda tutib.
Ko‘plab foydalanuvchilar tvitdan shikoyat qilib, buni ayirmachilarga tahdid deb hisoblagan, shundan so‘ng ijtimoiy tarmoq postni o‘chirib tashlagan.
Twitter’dan foydalanishga qo‘yilgan taqiqdan so‘ng kompaniya bundan juda xavotirda ekanini aytdi. U bepul internetga kirish zamonaviy dunyoda insonning muhim huquqi ekanini ta’kidladi va ijtimoiy tarmoqning Nigeriyadagi faoliyatini tiklash ustida ishlashga va’da berdi.
Izoh (0)