Juftlik surrogatlik yordami bilan bir yilda 20 nafar farzandni dunyoga keltirdi va 16 enagaga 67 ming funt (94 800 dollar) sarflaydi, deb yozadi “Korrespondent.net”.
23 yoshli rossiyalik Kristina O‘zturk 57 yoshli millioner eri Galip O‘zturk bilan Gruziyaga safari chog‘ida tanishgan. U yerga tadbirkor o‘z vatani Turkiyada umrbod qamoq jazosiga hukm qilingani tufayli kelgan edi.
Juftlik oilasi katta bo‘lishini orzu qilardi va shuning uchun ham surrogat onalar yordamida farzandli bo‘lishga qaror qildi. 2020-yilda Kristina va Galipning Mustafo ismli o‘g‘li dunyoga kelgan.
Bu er-xotinning birinchi farzandi emas: Kristinaning sobir turmush o‘rtog‘idan olti yoshli qizi bor bo‘lib, Galip ham o‘z navbatida, allaqachon turmush qurgan edi. Turkiyada u birinchi rafiqasi Xyuli O‘zturkdan to‘qqiz nafar farzand ko‘rgan.
Ularning ilk farzandi dunyoga kelgach, Kristina va Galip yana zurriyodlari bo‘lishni xohladi. Shundan so‘ng tadbirkor surrogat onalarga 138 ming funt sterling (195 500 dollar) to‘lagan va ularning oilasi 20 nafar farzandga ko‘paygan. Chaqaloqlar 4 oylikdan 14 oylikkacha bo‘lib, ularni 16 enaga parvarishlaydi. Ularning xizmatlari uchun ko‘p bolali ota-ona har yili 67,7 ming funt (94 800 dollar) sarflaydi.
Kristina nashrga bergan intervyusida barcha vaqtini bolalar bilan o‘tkazishini va “onalar odatda qiladigan hamma narsani” bajarishini aytdi. O‘zining hayoti haqida gapirib, ayol kunlari hech qachon zerikarli emasligini, chunki u doimo bolalarga g‘amxo‘rlik qilish bilan bandligini ta’kidlaydi. Odatda uning bolalari soat 20:00 dan soat 06:00 gacha uxlaydi.
Shu bilan birga, u kelajakda oilaga yangi mehmonlar qo‘shilishini tabiiy ravishda istisno etmaydi. “Men homiladorlikni rejalashtirmoqdaman, lekin darhol emas, chunki endi farzandlarimga yaqin bo‘lishim kerak. Homilador bo‘lgandan keyin 21 nafar kichkina bolaga ona bo‘lish qiyin”, — deb xulosa qiladi Kristina.