AQSh Adliya vazirligi Kapitoliyga hujum oqibatida yetkazilgan zararni 1,5 mln dollarga baholadi

AQSh Adliya vazirligi mamlakat sobiq prezidenti Donald Tramp tarafdorlarining hujumi natijasida Kapitoliyga yetkazilgan zararni 1,5 million dollarga baholadi, deb yozmoqda The Washington Post.

Gazetaning ma’lumotlariga ko‘ra, zarar miqdori bo‘yicha hisob-kitob voqea ishtirokchilaridan birining ishi bo‘yicha sud majlisi hujjatlarida mavjud bo‘lib, prokuratura bu summani sudlanuvchilardan undirishni rejalashtirmoqda: yengilroq jinoyatlarda aybdor deb topilganlar uchun 500 dollar, jiddiyroq modda bilan ayblanganlar uchun 2000 dollar miqdorida jarima belgilash ko‘zda tutilgan.

Kapitoliy bosh arxitektori vakillarining nashrga xabar berishicha, ular zararni baholab, hukumatga taqdim etgan, bu keyinchalik Adliya vazirligining hisob-kitoblari uchun asos bo‘ldi.

Eslatib o‘tamiz, 6-yanvar kuni kongress a’zolari Donald Trampning prezidentlik saylovlarida mag‘lub bo‘lganini tasdiqlash uchun yig‘ilgan vaqtda uning tarafdorlari Kongressga bostirib kirgan. Politsiya bir necha soat o‘tibgina namoyishchilarni Kapitoliydan haydab chiqarishga muvaffaq bo‘lgan. Huquq-tartibot organlari xodimlari o‘qotar qurol, dubinka, ko‘zdan yosh oqizuvchi gazdan foydalangan. Kapitoliyning xavfsizlik xodimi bilan birgalikda, besh kishi halok bo‘lgan. Tartibsizlikdan keyin federal qidiriv bo‘limi namoyish ishtirokchilariga qarshi 160 dan ortiq ish ochgan.

AQSh hukumatining xabar berishicha, Kapitoliyga qilingan hujum natijasida tarixiy ahamiyatga ega san’at asarlari va mebellar zarar ko‘rgan.

Avvalroq 6-yanvar kuni uyishtirilgan hujumdan keyin Kapitoliyni ta’mirlash uchun 30 million dollar talab etilishi ma’lum bo‘ldi. Hujumda 300 nafardan ortiq odam ayblandi va ularning eng kamida 280 nafari hibsga olindi.