Belarus prezidenti Aleksandr Lukashenko, zarurat bo‘lsa, respublikada ikkinchi atom elektr stansiyasi (AES) qurilishini istisno etmayapti, deb yozadi “Interfaks”.
“Kerak bo‘lsa, ikkinchi atom elektr stansiyasini quramiz. Buning istiqboli baland”, — dedi u energetika bo‘limlari rahbarlari bilan uchrashuvda.
Prezident fikriga ko‘ra, BelAESdan olinadigan elektr energiyasi talabgir bo‘ladi. “Agar biz oqilona rivojlanish kasb etsak, u holda bu elektr energiyasi ham kamlik qiladi. Bu juda toza energiya manbasi, u hamma joyda va hamma sohada kerak: uy-joy va sanoatdan tortib to AESning o‘zigacha”, — dedi u.
2-iyun kuni Belarus Favqulodda vaziyatlar vazirligining kollegiyasi BelAES litsenziyasiga o‘zgartirish kiritishga qaror qildi va birinchi energiya blokidan tijoriy maqsadlarda foydalanish huquqini berdi.
May oyida BelAES birinchi energiya blokining 2020-yil 22-dekabrdan boshlab amalga oshirilib kelgan tajriba-sanoat ekspluatatsiyasi bosqichi yakunlandi. Stansiyaning birinchi energiya blokini jismoniy ishga tushirish 2020-yil avgust oyida bo‘lib o‘tgan edi, uning tijoriy faoliyatini boshlash 2021-yilning birinchi yarmiga rejalashtirilgan.
Ikkinchi energiya blokining jismoniy ishga tushirilishi 2021-yilning kuzida, foydalanishga topshirish esa — 2022-yilning birinchi yarmida kutilmoqda.
Ikki energiya bloki to‘liq ishga tushirilgandan so‘ng, BelAES yiliga taxminan 18,5 milliard kilovatt/ soat elektr ishlab chiqarishi mumkin, bu esa mamlakatda elektr energiyasiga bo‘lgan ehtiyojning taxminan 40 foizini ta’minlaydi. Tajriba-sanoat ekspluatatsiyasi boshlanganidan beri BelAESda elektr energiyasi ishlab chiqarish 2,5 milliard kilovatt / soatdan oshdi.
Eslatib o‘tamiz, BelAES 2020-yil 7-noyabr kuni Aleksandr Lukashenko tomonidan tantanali ravishda ochib berilgan. Ochilish marosimida Lukashenko Belarus qudratli yadro davlatiga aylanishini ma’lum qilgan.
9-noyabr kuni esa (ba’zi manbalarda 8-noyabr kuni) AESning birinchi energoblokida kuchlanish transformatorlarining ishdan chiqishi sababli turbina to‘xtatilgani haqida ma’lumot paydo bo‘ldi. Belarus Energetika vazirligining xabar berishicha, atom elektrostansiyasida “alohida elektrotexnik o‘lchov qurilmalarini almashtirish zarurati aniqlangan, mazkur qurilmani almashtirish ishlari esa texnologik reglamentga asosan amalga oshirilmoqda”. 10-noyabr kuni Belarus Davlat atom nazorati xizmati almashtirilishi kerak bo‘lgan elektrotexnik o‘lchov qurilmasi xavfsizlikning 4-sinfiga taalluqli ekani va obyektning yadroviy va radiatsion xavfsizligiga ta’sir qilmasligi haqida xabar berdi
Izoh (0)