Janubiy Koreyada har yili an’anaviy tarzda o‘tkazib kelinadigan Space out musobaqasi bo‘lib o‘tdi. Musobaqa ishtirokchilari dam olish uchun shahar shovqinidan uzoqdagi o‘rmonga boradi va eng xotirjam deya topilgan inson taqdirlanadi, deb xabar beradi Esquire.

Foto: Instagram / The Space Out Competition

Mazkur musobaqa 2014-yildan buyon o‘tkazib kelinmoqda. Ishtirokchilar 90 daqiqa davomida shunchaki “dzen”ga erishishi va kundalik tashvishlardan chalg‘ishi darkor, ya’ni hech narsa qilmaslik kerak. O‘nlab ishtirokchilarni tomoshabinlar va hakamlar kuzatib boradi.

2021-yilda koronavirus sabab musobaqa ishtirokchilari soni 80 kishidan 30 kishiga qadar qisqartirilgan. Birinchi o‘rin 34 yoshli sartaroshga nasib etgan. Kumush medalga esa 2019-yilda g‘oliblikni qo‘lga kiritgan Li Radde ega chiqqan. U Seuldagi ingliz tilida olib boriladigan radioda boshlovchi bo‘lib ishlaydi, musobaqada ishtirok etish uchun mototsiklda Chedju oroliga qadar 10 soat yurib kelgan.

“Hayotimdagi eng ulkan yutug‘im — 2019-yilgi musobaqada g‘olib bo‘lganim. Shunday ekan, ikkinchi eng ulkan yutug‘im — bu 2021-yildagi ikkinchi o‘rin ekanligi mantiqan to‘g‘ri”, — deydi Radde.

Musobaqa mehnatkashlarga aybdorlik hissisiz xotirjamlikka erishish imkoniyatini taqdim etish maqsadida o‘ylab topilgan. Tashkilotchilarni musobaqalarni o‘tkazish uchun muntazam boshqa davlatlarga, jumladan, Yevropa mamlakatlariga ham taklif qilishadi. Bu kabi bellashuvlar hozirga qadar Pekin va Rotterdamda o‘tkazilgan.