2021-yilda Apple ikkita plansheti — iPad va iPad mini’ning bazaviy modellarini yangilaydi, 2022-yilda esa yangi iPad Pro versiyasini taqdim etadi, deb xabar beradi “Korrespondent.net”.
Foto: Twitter / @wylsacom
Ta’kidlanishicha, Kupertinodagi kompaniya shu orqali pandemiya vaqtida o‘z planshetlariga bo‘lgan talabning ortishiga yechim topmoqda. 2020-yilning ikkinchi yarim yilligida iPad savdosi 2019-yilning mos davriga nisbatan 43 foizga oshgan.
O‘sish 2021-yilning birinchi choragida ham davom etgan.
Insayderlarning ma’lumotlariga ko‘ra, lineykadagi iPad mini so‘nggi olti yil ichida birinchi bor ingichka hoshiyalarga ega yangilangan dizaynga ega bo‘ladi. Displey diagonali 7,9 dan 9 dyuymga qadar ortadi.
Shuningdek, bazaviy iPad planshetining ancha ingichka versiyasini yaratish ustida ishlar olib borilmoqda — u talabalar orasida ommalashgan iPad 10.2 modelining o‘rnini egallaydi. Ikkala yangi qurilma ham 2021-yilning oxirida taqdim etiladi.
2022-yilda Apple magnitli simsiz MagSafe quvvatlantirgichiga ega birinchi iPad Pro’ni chiqaradi. Planshet yangi reversiv quvvatlantirish funksiyasi bilan jihozlanishi mumkin. Bundan tashqari, iPad Pro dizayni ham muhim o‘zgarishga uchraydi — uning orqa paneli oldingidek alyuminiydan emas, balki shishadan ishlanadi.
Ta’kidlanishicha, yangi iPad’ni yaratish ishlari hali boshlang‘ich bosqichda va kompaniya rejalari o‘zgarib ketishi mumkin.
Avvalroq iPhone’da ovqat iste’molini nazorat qiladigan funksiya paydo bo‘lishi, Apple mitti naushniklarini taqdim etishga tayyorlanayotgani to‘g‘risida xabar berilgandi.
