Italiyada 14 kishining hayotiga zomin bo‘lgan dor yo‘lining uzilib ketishiga yetti yildan buyon favqulodda tormoz tizimining o‘chirilgan holda harakatlangani sabab bo‘lishi mumkin. Bu haqda Ansa nashriga tayanib “Korrespondent.net” xabar berdi.
Qayd etilishicha, halokatni o‘rganayotgan Verbaniya prokuraturasiga 2014-yildan 2018-yilgacha Shveysariya fuqarosi Mixael Meyer tomonidan olingan videoyozuvlar kelib tushdi. Ularda o‘sha davrda ham dor yo‘li mexanizmida qisqichlar bo‘lganini ko‘rish mumkin.
Prokuror Olimpiya Bossining so‘zlariga ko‘ra, videoyozuvlar tergov guruhiga topshirildi.
Eslatib o‘tamiz, halokat 23-may kuni Turin provinsiyasidagi Streza-Mattarone dor yo‘lida sodir bo‘lgan edi. Kabina uzilib, o‘rmon ichiga, borish qiyin bo‘lgan joyga qulab tushgan. 15 nafar yo‘lovchining 13 nafari voqea joyida halok bo‘lgan. Tirik qolgan bolalarning ikki nafari shifoxonaga yetkazilgan va ulardan biri olingan jarohatlar oqibatida vafot etgan.
Oldinga tortilgan trosning uzilib ketishi halokatga sabab bo‘lgan. Bunday holda kabinaning avtomatik tormoz tizimi ishga tushishi kerak edi, lekin tizimning ikkita elementidan kamida bittasi bloklanib qolgan.
Prokurorlarning so‘zlariga ko‘ra, dor yo‘lining egasi va ikki nafar ishchisi kabinaning xavfsizlik qulfi ochiq holda ishlayotganini bilgan. Ularning ma’lumotlariga ko‘ra, texnik muammolar tufayli ularning doimiy faollashuvidan saqlanish uchun ular ataylab tormoz tizimiga qisqich o‘rnatgan.
Ma’lumot uchun, yo‘l 1970-yilda ochilgan. So‘nggi marta u 2014—2016-yillarda to‘liq ta’mirdan chiqarilgan.
Izoh (0)