Indoneziya Qurolli Kuchlari aprel oyida Bali orolida cho‘kib ketishi oqibatida 53 nafar ekipaj a’zosi halok bo‘lgan Nanggala-402 suvosti kemasini evakuatsiya qilish ishlarini rasman yakunladi, deb yozmoqda Reuters.
“Qutqaruv ishlari yakunlandi”, — deb ta’kidladi harbiy-dengiz kuchlarining rasmiy vakili Yulius Vijoxono.
Uning qo‘shimcha qilishicha, bir oy ichida “suvosti kemasidan zarur materiallar” allaqachon olingan, lekin operatsiyani tugatish to‘g‘risidagi qaror dengizchilarning kemani qayta tiklash imkoniyati bo‘lmaganini anglatadi.
Fojianing rasmiy sabablari hozircha taqdim etilmadi.
Indoneziya harbiy-dengiz kuchlari qutqaruv operatsiyasida yordam bergan barcha davlatlarga minnatdorchilik bildirdi.
“Biz suvosti kemasini izlashda yordam bergan barcha qayiqlarga chuqur minnatdorchilik bildiramiz”, — dedi ikkinchi flotning dengiz xavfsizlik kuchlari qo‘mondoni Gung Pita Alit Jaya.
Uning so‘zlariga ko‘ra, guruh suvosti kemasiga 20 marta sho‘ng‘igan va cho‘kib ketgan suvosti kemasining qismlarini olib chiqishga, shuningdek, fotosuratlar va videoyozuvlar olishga muvaffaq bo‘lgan.
Eslatib o‘tamiz, 21-aprel kuni Bali yaqinidagi o‘quv mashg‘ulotlarda KRI Nanggala 402 suvosti kemasi bilan aloqa uzilib qolgan va u bedarak yo‘qolgan. Keyinchalik AQSh Indoneziyaning g‘oyib bo‘lgan suvosti kemasini qidirish uchun aviatsiya yuborishi, bedarak yo‘qolgan suvosti kemasida kislorod tamom bo‘lgani haqida xabarlar berilgan. Sodir bo‘lgan voqeaning kelib chiqish sabablari yuzasidan rasmiy taxminlar bildirilmagan.
25-aprel kuni suvosti kemasining qoldiqlari topilgani va kemaning barcha ekipaji qurbon bo‘lgani e’lon qilindi.
Izoh (0)