Toshkentdagi Magic City ko‘ngilochar bog‘iga tashrif buyuruvchilar soni ko‘paygani bois ba’zi ko‘chalarda harakat vaqtincha cheklanadi

Toshkentdagi ba’zi ko‘chalarda transport harakati cheklanadi, deya xabar bermoqda shahar IIBB.

Qayd etilishicha, Toshkentda 1-iyun – Xalqaro bolalarni himoya qilish kuni munosabati bilan o‘tkazilayotgan tadbirlarga, shuningdek, yangi ochilgan Magic City ko‘ngilochar maskaniga tashrif buyuruvchi fuqarolar soni ko‘pligi sababli transport vositalarining tirbandligi yuzaga kelgan.

Shu munosabat bilan quyidagi ko‘chalarda transport vositalarining harakatlanishi vaqtinchalik cheklanadi:

• Seul ko‘chasi – Furqat ko‘chasidan Bunyodkor ko‘chasigacha;
• Furqat ko‘chasi – Islom Karimov ko‘chasidan Sharshara ko‘chasigacha;
• Bobur ko‘chasi – Sharshara ko‘chasidan O‘rikzor ko‘chasigacha.

“Hurmatli fuqarolar va poytaxtimiz mehmonlari! Magic City va boshqa ko‘ngilochar maskanlarga tashrif buyurganingizda transport vositalaringizni boshqa transport vositalarining harakatlanishiga xalaqit bermaydigan masofada qoldirishingizni hamda ko‘ngilochar maskanga piyoda tashrif buyurishingizni so‘raymiz”, – deyiladi IIBB axborotida.