Qashqadaryo viloyatining Chiroqchi tumanida urug‘siz qora tarvuz yetishtirildi. Bu haqda Davlat bojxona qo‘mitasi matbuot xizmati xabar berdi.
Ma’lum qilinishicha, tumanning “O‘tamayli” hududida har yili may oyining birinchi o‘n kunligida qovun va tarvuzlar mamlakatda birinchi bo‘lib pishib yetiladi hamda eksportga jo‘natiladi.
Bu yil tarvuz yetishtirishda yana bir yangilikka qo‘l urilgan — dehqonlarning tinimsiz izlanishlari va mehnati natijasida urug‘siz qora tarvuzlar yetishtirilgan.
“Rossiyalik xaridorlarning tavsiyasi bilan ilk marotaba tarvuzning yangi Style navini yetishtirdik. Lalmi yerlarda qurilgan issiqxonalarda parvarishlangan tarvuzlar eksportga mo‘ljallangan. Hosil ko‘rganingizdek may oyida tayyor bo‘ldi”, — deydi Ulug‘bek Jumanazarov.
Eslatib o‘tamiz, 2020-yilda Qashqadaryo viloyatidan Rossiyaga sariq tarvuz eksporti yo‘lga qo‘yilgani to‘g‘risida xabar berilgandi.
Izoh (0)