Germaniyadagi AutoScout24 onlayn-maydonchasida 1952-yilda ishlab chiqarilgan qora “GAZ-12 ZIM” sotuvga qo‘yildi. So‘nggi 40 yil davomida garajda harakatsiz turgan limuzin 25 ming yevroga baholanmoqda, deb xabar beradi Motor.
“GAZ-12 ZIM” 1948-yildan 1960-yilga qadar ishlab chiqarilgan. Gorkiy avtomobil zavodi konveyeridan jami 21,5 ming nusxa limuzin chiqqan bo‘lib, avtomobillarning aksariyati SSSR hukumati vakillari o‘rinbosarlarining avtoparklarini to‘ldirgan.
Sotuvga qo‘yilgan nusxa so‘nggi 40 yil davomida iliq garajda harakatsiz saqlangan. Sotuvchining so‘zlariga ko‘ra, limuzin o‘zining zavoddagi lak-bo‘yog‘ini to‘liq saqlab qolgan va interyeri ham original. Biroq yillar davomidagi harakatsizlik “GAZ-12”ning tashqi ko‘rinishiga ta’sir ko‘rsatmay qolmagan. Mashina eksteryeridagi xromlangan detallarda zang paydo bo‘lgan, ayrim tub qismlarida korrozi o‘chog‘ini uchratish mumkin.
Ushbu limuzin 90 ot kuchiga ega 3,5 litrli benzin dvigatel yordamida harakatga keladi. Agregat mexanik uzatmalar qutisi yordamida boshqariladi. Hozirga qadar 100 ming kilometr yo‘l bosgan “GAZ-12 ZIM” 25 ming yevroga baholanmoqda.
Avvalroq Germaniyada Brejnevga tegishli bo‘lgan “Chayka” yana bir bor sotuvga qo‘yilgani, Yaponiyada salonida billur qandili bor Cadillac limuzini sotilayotgani to‘g‘risida xabar berilgandi.
Izoh (0)