Davlat xavfsizlik xizmati xodimlari tomonidan respublikaning qator viloyatlarida o‘tkazilgan tezkor tadbirlar davomida bir necha kilogramm givohvandlik moddalarining mamlakatga olib kirilishiga chek qo‘yildi. Bu haqda idora matbuot xizmati “Daryo”ga ma’lum qildi.
Davlat xavfsizlik xizmati Buxoro viloyati boshqarmasi xodimlarining Davlat bojxona qo‘mitasi bilan hamkorlikda o‘tkazgan tezkor tadbiri davomida Samarqand—Toshkent yo‘nalishi bo‘yicha harakatlanayotgan Lacetti rusumli avtotransport vositasi Sirdaryo viloyatidagi “Yangiobod” YPX maskanida to‘xtatilgan.
Avtomobil ko‘zdan kechirilganda, unda yo‘lovchi sifatida ketayotgan chet el fuqarosi hamda Toshkent shahrida yashovchi fuqaro yonida 3,165 kilogramm opiy giyohvandlik vositasi hamda 35 dona psixotrop tabletka borligi aniqlanib, protsessual tarzda rasmiylashtirib olingan.
Tergovga qadar tekshiruv harakatlari davomida ular mazkur giyohvand moddalarni Samarqand shahridagi avtoturargohda xalqaro yuk tashuvchi avtomashina haydovchisi bo‘lgan chet el fuqarosidan 15 ming AQSh dollariga sotib olganliklari ma’lum bo‘lgan.
Shundan so‘ng tezkor tadbir davom ettirilib, ushbu xorijlik haydovchi vaqtincha bo‘lib turgan Samarqand shahridagi avtoturargoh hamda uning boshqaruvida bo‘lgan yuk avtomashinasi ko‘zdan kechirilganda, avtomashinaning salon qismida 15 ming AQSh dollari hamda u tomonidan avtoturargohning yordamchi binosiga yashirib qo‘yilgan 3,96 kilogramm opiy giyohvandlik moddasi borligi aniqlanib, xolislar ishtirokida rasmiylashtirib olingan.
Aniqlanishicha, Afg‘onistonda yetishtirilgan ushbu narkotik moddalar uchinchi davlat orqali mamlakatga olib kirilgan.
Shuningdek, DXX Farg‘ona viloyati boshqarmasi tomonidan o‘tkazilgan tezkor tadbirda Toshkent—Qo‘qon yo‘nalishida harakatlanib kelayotgan Nexia-1 rusumli avtotransport vositasi Dang‘ara tumani hududida to‘xtatilib, ko‘zdan kechirilgan.
Unda yo‘lovchi sifatida ketayotgan Toshkent viloyatining Bekobod shahrida yashovchi 3 nafar fuqaroga tegishli bo‘lgan 1 kilogrammdan ortiqroq og‘irlikdagi gashish giyohvand moddasi borligi aniqlanib, tegishli tartibda rasmiylashtirib olingan.
Ma’lum bo‘lishicha, ushbu giyohvand modda Tojikistonda 7 ming dollarga sotib olinib, so‘ngra Bekobod tumani hududiga kontrabanda yo‘li bilan olib o‘tilgan. Og‘ufurushlar uni Qo‘qon shahrida sotishni rejalashtirishgan.
Bundan tashqari, Farg‘ona tumanida yashovchi 34 yoshli fuqaro Qirg‘izistonning Qadamjoy tumanida istiqomat qiluvchi shaxs tomonidan o‘zbek—qirg‘iz davlat chegarasidagi sim to‘siqlar ustidan uloqtirilgan 1,367 kilogramm gashish giyohvandlik moddasini qabul qilib olib, kelgusida sotish maqsadida o‘z xonadoniga yashirib qo‘ygan.
DXX xodimlari tomonidan o‘tkazilgan tezkor tadbirda uning xonadonidan ushbu giyohvandlik moddasi protsessual tartibda rasmiylashtirib olingan.
Farg‘ona tumanida kuzatilgan yana bir holatda 40 yoshli, muqaddam sudlangan fuqaro o‘z yashash xonadonida hamqishlog‘idan 983 gramm gashish moddasini qabul qilib olgan vaqtida DXX xodimlari tomonidan ushlangan. Shuningdek, mazkur giyohvand moddasini qo‘shni davlatdan olib o‘tishga ko‘maklashgan 26 yoshli uchinchi shaxs ham qo‘lga olingan.
Aniqlanishicha, ushbu giyohvandlik vositasi Qirg‘izistonda 6,5 ming dollarga sotib olinib, kontrabanda yo‘li bilan respublikamiz hududiga olib o‘tilgan.
DXX Namangan viloyati boshqarmasi va viloyat bojxona boshqarmasi xodimlari hamkorligida o‘tkazilgan tezkor tadbirda Namangan— Toshkent yo‘nalishida harakatlanayotgan Namangan shahrida yashovchi, 34 yoshli fuqaro boshqaruvidagi Nexia-3 avtomashinasi Qamchiq dovonida joylashgan YPX maskanida to‘xtatilgan.
Avtomashina ko‘zdan kechirilganda, uning salon qismida Qirg‘izistondan noqonuniy olib kelingan 2800 dona kapsuladagi “Regapen” va 1309 dona flakondagi “Tropikamid” kuchli ta’sir qiluvchi dori vositalari borligi aniqlanib, protsessual tarzda rasmiylashtirib olingan.
Hozirda ushbu shaxslarga nisbatan qo‘zg‘atilgan jinoyat ishlari doirasida zarur chora-tadbirlar amalga oshirilmoqda.
Avvalroq Chilonzorda go‘sht ichiga giyohvand modda joylashtirib olib ketayotgan shaxs ushlangani, Toshkentda kuchli ta’sir qiluvchi dori vositalari savdosi bilan shug‘ullangan jinoiy guruh qo‘lga olingani, Jizzaxda bojxonachilar tomonidan to‘xtatilgan Epica’dan gashish, Samarqandda avtomobil shinasi ichidan opiy topilgani hamda Namanganda umumiy qiymati 2 mlrd so‘mlik dori vositalarini mamlakat hududiga olib kirgan shaxslar ushlangani haqida xabar berilgandi.
Izoh (0)