Toshkent—Xojikent poyezdlarining 1-iyungi 4 ta reysi bekor qilinadi

Toshkent—Xojikent—Toshkent shaharlararo yo‘lovchi poyezdlarining 4 ta reysi bir kunga bekor qilinadi. Bu haqda Transport vazirligi matbuot xizmati xabar berdi.

Ma’lum qilinishicha, 1-iyun kuni “Toshkent mintaqaviy temiryo‘l uzeli” UKga qarashli Qodirya—Oqqovoq stansiyalari oralig‘idagi 1 kilometr temiryo‘lda hamda mazkur temiryo‘lning 16-kilometrida kapital ta’mirlash ishlari amalga oshiriladi.

Shu sababli 1-iyun kungi harakat jadvali bo‘yicha soat 07:10 da, 10:10 da, 14:06 da, 16:42 da harakatlanadigan Toshkent—Xojikent yo‘nalishlarida qatnov bekor qilinadi.

Shu kuni soat 17:31 hamda soat 19:13 da harakatlanadigan Toshkent—Xojikent yo‘nalishidagi shaharlararo yo‘lovchi poyezdlari harakat jadvali bo‘yicha qatnovini amalga oshiradi.

Eslatib o‘tamiz, Toshkent—Xojikent shaharlararo tezyurar poyezdi qatnovi 2019-yilning may oyidan yo‘lga qo‘yilgan.