“VKontakte”, Twitter va WeChat ijtimoiy tarmoqlarida O‘zbekiston fuqarolarining shaxsiga doir ma’lumotlar “Shaxsga doir ma’lumotlar to‘g‘risida”gi qonunning 27−1-moddasi talablariga zid ravishda ishlov berilmoqda. Bu 2021-yil may oyida o‘tkazilgan monitoring natijasida aniqlandi, deb xabar beradi “O‘zkomnazorat” inspeksiyasi matbuot xizmati.
“VKontakte”, Twitter va WeChat ijtimoiy tarmoqlarida O‘zbekiston fuqarolarining shaxsiga doir ma’lumotlarga qonun talablariga zid ravishda ishlov berilayotgani uchun “O‘zkomnazorat” tomonidan “Shaxsga doir ma’lumotlar to‘g‘risida”gi qonunning 27−1-moddasi talablariga rioya etilishini ta’minlash choralarini ko‘rish yuzasidan “Mail.ru Group”, Twitter Inc va Tencent-Inc kompaniyalariga ko‘rsatmalar berilgan.
Mazkur tartib 16-apreldan o‘rnatilgan, ammo tegishli davlat organlarining ushbu sohada ko‘rinadigan natijalarga erishmagani deputatlarning e’tirozlariga sabab bo‘lgan edi. Avvalroq mazkur qoidaga amalga qilinishi Oliy Majlis Qonunchilik palatasining Innovatsion rivojlanish, axborot siyosati va axborot texnologiyalari masalalari qo‘mitasi yig‘ilishida o‘rganilgandi.
“Bu ijtimoiy tarmoqlar va internet kompaniyalar O‘zbekistonda qonuniy faoliyat yuritishni istashsa, o‘z texnik vositalarini O‘zbekiston hududiga o‘tkazishlari shartiligini yoki belgilangan tartibda ma’muriy yoxud jinoiy javobgarlikka tortilishlari mumkinligini anglatadi”, — deya qayd etilgan edi qo‘mita bayonotida.
Avvalroq O‘zbekistonda shaxsga doir ma’lumotlarni noqonuniy tarqatganlik uchun jinoiy javobgarlik kuchaytirilishi mumkinligi, O‘zbekiston fuqarolarining shaxsiy ma’lumotlarini mamlakatda saqlash majburiy bo‘lishi, fuqarolarining ma’lumotlarini xorijda saqlaydigan saytlar jarimaga tortilishi mumkinligi to‘g‘risida xabar berilgandi.
Izoh (0)