Apple kompaniyasi MagSafe magnit quvvatlantirgichini 2020-yilda — iPhone 12 smartfonlari seriyasi bilan birga taqdim etgan edi. Tizim blogerlar va ekspertlar tomonidan yaxshilab o‘rganilgan, biroq vaqt o‘tgan sari foydalanuvchilar MagSafe’ning “hujjatlashtirilmagan” yangi imkoniyatlaridan xabar topmoqda, deb xabar beradi IXBT.
Avvalroq iPhone 12 smartfonlari ichki MagSafe magnitlari yordamida qumdagi temirlarni yig‘ishga qodir ekanligi ma’lum bo‘lgandi. Endi esa iPhone’dagi MagSafe magnitlari Berlindagi kanal ostidan smartfonni “tutishga” yordam berdi.
Frederik Ridel ismli dasturchining Twitter’dagi sahifasida yozishicha, uning do‘sti 29-may kuni iPhone 12 Pro smartfonini Berlindagi kanalga tushirib yuborgan. Bir metr chuqurlikdagi suv ostidan iPhone 12 Pro’ni topish borasidagi urinishlar besamar ketgan.
Shundan so‘ng do‘stlar “magnitli qarmoq” yasab, smartfonning orqa panelidagi MagSafe magniti yordamida kanal ostidan iPhone 12 Pro’ni chiqarib olishga muvaffaq bo‘lgan.
Tungi soat 03:00 larda suv ostidan chiqarib olingan smartfon normal holatda ishlayotgan bo‘lgan, suv ostida bir necha soat yotganiga qaramay, batareya quvvati deyarli kamaymagan.
Izoh (0)