Buxoroda 2021-yilning 28—30-may kunlari XIX “Ipak va ziravorlar” Xalqaro an’anaviy festivali bo‘lib o‘tgani xabar berilgan edi. Uch kun davom etgan festivalning ikkinchi kunidagi tantanali yurishda chavandoz va otning yerga yiqilish holati “Haqiqiy vatanparvar yerga qulasa ham, bayroqni qo‘ldan tashlamadi”, deya talqin qilindi. “Daryo” muxbiri ushbu holatning qanday sodir bo‘lgani bilan qiziqdi.
Ma’lum bo‘lishicha, festival jarayonlari 30 dan ortiq loyihalardan iborat bo‘lib, ularga 15 mingga yaqin xorijlik va mahalliy sayyohlar jalb qilingan. Birgina tantanali karvon yurishida (marsh) sportchiyu, folklor dastalar, san’atkor va hunarmandlar, korxona-tashkilot, o‘quv muassasalari xodimlari, aholi va talaba yoshlardan iborat 5 mingga yaqin fuqarolar qamrab olingan.
“‘Ark’ qo‘rg‘onidan ‘Labi hovuz’ majmuasigacha bo‘lgan manzildagi karvon yurishida Buxoro yakka kurash sport maktabiga qarashli ot sporti maktabining yettita otidan foydalanilgan. Otlarni boshqarish uchun tajribali yetti nafar chavandoz biriktirilgan. Karvon yurishida otlarning biri qo‘qqisdan qattiq hurkkan va kutilmaganda sirpanib, chavandoz bilan birga yerga yiqilgan. Chavandoz otdan yiqilayotgan kezda ham o‘zini yo‘qotib qo‘ymagan va O‘zbekiston bayrog‘ini yerga tushirib yubormaslik uchun uni qo‘lida dast tutgan.
Ijtimoiy tarmoqlarda tarqalgan ushbu surat izohiga qiziqqan “Daryo” muxbiri Buxoro yakka kurash sport maktabi direktori Sarvi Umarov bilan telefon orqali bog‘langan. Sarvi Umarov “Savolingizga javob berishim uchun sizda nima asos bor?” — deya holatdan xabarsizligini, hatto bu haqda eshitmaganini aytib, qo‘pollik qilgan.
Shundan so‘ng “Daryo” muxbiri Buxoro yakka kurash sport maktabiga qarashli ot sporti maktabi chavandozi Sanjar Rahimov (suratdagi chavandoz) bilan suhbatda bo‘lgan.
“Bilasiz, tantanali yurish juda ko‘tarinki kayfiyatda, karnay-surnay, doirayu nog‘oralar sadosi ostida boshlanadi. Ming-minglab odamlar jalb etiladi. Eng old qatorda esa biz, chavandozlar yuramiz. Bizni esa oldinda juda ko‘plab televideniye operatorlari hamda suratkashlar qarshilab boradi. Ikki yon tomon esa aholi bilan gavjum, ‘qiy-chuv’, shodon qiyqiriqlar. Shunday kezda menga biriktirilgan ot kutilmaganda hurkib, kishnab, taqali tuyog‘i sirpanib ketdi va ag‘darildi. O‘ng qo‘limda esa O‘zbekiston bayrog‘i. Bu holat shu qadar qisqa fursatda tez sodir bo‘ldiki, otga qo‘shilib yiqilayotganimni bilib, shunda ham o‘ng qo‘limdagi bayroqni yerga tushirib yubormaslik uchun chaqqonlik bilan chap qo‘l tirsagimni yerga tirab oldim”, — deydi chavandoz Sanjar Rahimov.
Chavandozning aytishicha, ayni shu holatda odamlar tezkorlik bilan ko‘makka emas, suratga olish uchun shaylangan. Bir necha daqiqa ichida o‘zi va boshqaruvidagi ot ahvolini o‘nglagan chavandoz karvonga qo‘shilib, yurishda davom etgan.
“Ot sporti maktabi tantanali karvon yurishi mo‘ljallangan ‘Ark’ qo‘rg‘onidan yetti kilometr olisda. Otlarning tuyoqlariga himoya vositasi bo‘lgan taqalar urilgani uchun ularni baholiqudrat asfalt yo‘llarning cheti, ya’ni qum-tuproqli joydan yurgizdik. Asfaltli yo‘lda otlarning taqali tuyoqlarda yurishi ham ancha-muncha mushkul. Biroq shunday yo‘llarda ham otlar qo‘qqisdan hurkmasa yoki cho‘chimasa, bunday holatlar yuzaga kelmaydi”, — deydi chavandoz.
Chavandoz mazkur voqeaga nisbatan ijtimoiy tarmoqlar orqali bildirilgan masxaromuz va kinoyali munosabatlardan ranjiganini ham qo‘shimcha qildi.
“Hatto, ‘chavandoz spirtli ichimlik iste’mol qilib, mast holatda bo‘lgan’, degan haqoratomuz gaplar ham bo‘ldi. Bu hammasidan o‘tib tushdi. Allohga shukur, besh vaqt namozdaman. 1985-yildan buyon ot sporti bilan shug‘ullanaman, sport ustasiman, tajribam yetarli. Biroq ayni o‘sha damda yerga ag‘darilib tushayotganimni ongli ravishda his qila turib, qo‘limdagi bayroqning oyoqosti bo‘lishi va yerga tushib ketishini istamadim, xolos. Shukurki, otga ham, o‘zimga ham hech qanday ziyon yetgan emas”, — deydi chavandoz.
Izoh (0)