Yevropalik astronavt Samanta Kristoforetti Xalqaro kosmik stansiyadagi (XKS) birinchi ayol qo‘mondon bo‘ladi, deb yozmoqda Tengrinews.
Kristoforetti XKSda 68-ekspeditsiyani boshqaradi hamda 2022-yilda SpaceX kompaniyasining Crew Dragon kemasida NASA astronavtlari Chell Lindgren va Bob Xayns bilan birga parvoz qiladi. Ma’lumotlarga ko‘ra, bu Kristoforettining XKSga ikkinchi parvozi bo‘ladi.
“Yevropa nomidan XKSga qaytish men uchun sharaf. Men qo‘mondonlik tayinlovini faxr bilan qabul qilaman hamda kosmosda va Yerda to‘plangan tajribani juda iste’dodli jamoa boshchiligida orbitada qo‘llash imkoniyatini kutyapman”, — deb iqtibos keltirdi Yevropa kosmik agentligi (YKA) Kristoforettining so‘zlaridan.
YKAning ma’lumotlariga ko‘ra, Kristoforetti XKSning beshinchi yevropalik qo‘mondoniga aylandi. Avval ham ayollar XKSning qo‘mondonlari bo‘lgan. Ekipajni turli vaqtlarda amerikalik Sunita Uillyams va Shennon Uoker boshqargan. Shuningdek, amerikalik Peggi Uitson ikki marta XKSdagi ekspeditsiyaga qo‘mondon bo‘lgan.
Avvalroq Birlashgan Arab Amirliklarining bosh vaziri Muhammad bin Rashid al-Maktum mamlakatning birinchi ayol kosmonavti Nura al-Matrushiy bo‘lishini ma’lum qilgan edi. “Ikki nafar yangi kosmonavtlarning biri ayol kishi ekanini ma’lum qilamiz. Nura al-Matrushiy va Muhammad al-Mullani tabriklayman”, — degan bosh vazir o‘zining ijtimoiy tarmoqdagi blogida.
Izoh (0)