Xitoy janubidagi Guanchjou shahri hukumati koronavirus avj olishi tufayli bir nechta ko‘chalarni yopib qo‘ydi, deb yozadi “RBK”. Shu ko‘chalarda yashovchi fuqarolar uylaridan chiqishi taqiqlandi.
Bunda gap Livan tumanidagi beshta ko‘cha haqida bormoqda. Shahar ma’muriyati to‘rtta ko‘chada epidemiya xavfi past darajadan o‘rta darajaga ko‘tarilganini bildirmoqda.
Ushbu ko‘chalarda bitta oilaning faqat bir vakili eng zarur buyumlarni sotib olish uchun uydan chiqishi mumkin. Bu tumanda barcha ko‘ngilochar muassasalar, yopiq sport inshootlari, ulgurji bozorlar va bolalar muassasalari yopilishi shart. Restoranlar faqat uyga olib ketish uchun ishlaydi. Maktablar esa darslarni bekor qiladi (boshlang‘ich va yuqori sinflardan tashqari).
29-may holatiga ko‘ra, Guanchjouda COVID-19’ga chalinish bilan bog‘liq oltita holat aniqlangan bo‘lib, shularning beshtasida kasallik simptomsiz kechmoqda. 21-maydan buyon shaharda 20 kishi kasallangan, ularning 15 nafarida virus yashirin shaklda kechmoqda. Hukumat fikricha, koronavirusning avj olishi virusning “hindcha” shtammini yuqtirib olgan 75 yoshli erkak bilan bog‘liq. Kasallanganlarning qolgani aynan u bilan muloqotda bo‘lgan.
Yangi koronavirusning avj olishi ilk bor Xitoyning Uxan shahrida qayd etilgan. Avvalroq AQSh Vakillar palatasining razvedka bo‘yicha qo‘mitasidagi respublikachilar virusning laboratoriyada yaratilgani borasida “jiddiy bilvosita dalillar” borligini ma’lum qilgandi. Ularning ma’lumotlariga ko‘ra, COVID-19 pandemiyasiga Uxan virusologiya institutidan virus sizib chiqishi sabab bo‘lgan bo‘lishi mumkin.
AQShdagi Xitoy elchixonasi bu ayblovlarni rad etib, o‘z navbatida, Vashington “koronavirusning kelib chiqishi mavzusi bo‘yicha e’tiborni o‘ziga jalb qilish bilan bog‘liq eski siyosiy hiyladan foydalanish”ga urinayotganini aytdi.
Keyinroq Amerika prezidenti Jo Bayden razvedka COVID-19’ning kelib chiqishi bo‘yicha ikkita — kasallangan hayvondan yuqqani va laboratoriyadan sizib chiqqani haqidagi variantlarni istisno qilmasligini ma’lum qildi.
Izoh (0)