Salvatore Garau ismli italiyalik haykaltarosh o‘zining “Men mavjudman” nomli ko‘rinmas “haykali”ni 15 ming yevroga sotdi, deb xabar beradi “Korrespondent.net”.
Ta’kidlanishicha, ushbu ijod namunasi zamonaviy san’at bilan shug‘ullanuvchi Art-Rite kimoshdi uyi tomonidan tashkillashtirilgan auksionda sotilgan.
Xaridor rostan ham havo emas, balki san’at namunasini xarid qilganini tasdiqlovchi maxsus sertifikat ham mavjud.
Garauning o‘zini so‘zlariga ko‘ra, uning “haykali” faqat xususiy uyga sig‘adi. Uni “o‘rnatish” uchun polda o‘lchami 1,5x1,5 metr bo‘lgan bo‘sh joy kerak. Ijodkorning hisoblashicha, bo‘shliq — bu energiya bilan to‘lgan makon.
“Bo‘shliq — energiyaga to‘la makon va uni bo‘shatsak ham, hech narsa qolmagan taqdirda ham, Geyzenbergning noaniqlik prinsipiga ko‘ra, yo‘q narsaning og‘irligi bor. Shunday ekan uning kondensatsiyalanib, zarralarga, qisqacha aytganda, bizga aylanuvchi energiyasi mavjud”, — deydi u.
Nashrning yozishicha, bu Garauning birinchi ko‘rinmas “haykali” emas. 2020-yilning fevralida u Milandagi maydonda “Mushohada qilayotgan Budda” nomli ishini “namoyish etgandi”.
Izoh (0)