Rossiya va O‘zbekiston hukumatlari koronavirusga qarshi “Sputnik V” vaksinasini ishlab chiqarishni mahalliylashtirishga kelishib oldi, O‘zbekiston tomoni dori vositasi ishlab chiqariladigan hududni ham tanlagan. Bu haqda Rossiya sog‘liqni saqlash vaziri Mixail Murashkogo tayanib, “RIA Novosti” xabar berdi.
Rossiya sog‘liqni saqlash vaziri Mixail Murashko boshchiligidagi delegatsiya 28-may kuni Prezident Shavkat Mirziyoyev qabulida bo‘lgani to‘g‘risida xabar berilgandi.
“Rossiya va O‘zbekiston prezidentlarining topshirig‘i doirasida ‘Sputnik V’ vaksinasini O‘zbekistonda ishlab chiqarish bo‘yicha kelishib olindi”, — deydi Murashko.
Vazirning qo‘shimcha qilishicha, O‘zbekiston tomoni hozirda Rossiya vaksinasini ishlab chiqarishni yo‘lga qo‘yadigan hududni tanlab bo‘lgan, loyiha ustida ishlar olib borilmoqda.
Eslatib o‘tamiz, O‘zbekistonga “Sputnik V” vaksinasining birinchi partiyasi 23-aprelga o‘tar kechasi yetkazib berilgan edi (aynan qancha miqdorda vaksina olib kelingani ma’lum qilinmagan). 27-aprel kuni ushbu vaksinaning navbatdagi partiyasi olib kelingan. O‘zbekistonga aholini emlash uchun olib kelinadigan “Sputnik V”ning yarmini tadbirkor Alisher Usmonov moliyalashtirgan. 31-mart kuni ushbu vaksinadan jami 1 million doza sotib olinishi ko‘zda tutilgani ma’lum qilingandi.
Izoh (0)