Namangan viloyati hokimi Shavkat Abdurazzoqov Ukrainaning Xmelniskiy shahri meri Aleksandr Simchishin boshchiligidagi delegatsiyani qabul qildi. Bu haqda “Daryo” muxbiri Azizbek Abduvaliyev xabar bermoqda.
Shavkat Abdurazzoqov mehmonlar bilan Namanganda Xalqaro gullar festivali bo‘lib o‘tayotgan kunlarda uchrashayotganidan mamnunligini ta’kidladi va o‘zaro hamkorlikning istiqbolli yo‘nalishlari borasida takliflarini bildirdi. Xususan, savdo, logistika, sanoat va turizm sohalarini rivojlantirish borasida salmoqli ishlarni amalga oshirish mumkinligi qayd etildi.
Xmelniskiy meri Aleksandr Simchishin Ukrainadagi shu nomli viloyat markazi bo‘lgan yirik va qadimiy shahar ma’muriyati Namangan bilan hamkorlikni har tomonlama kuchaytirish tarafdori ekanini ta’kidladi.
Namangan va Xmelniskiy shaharlari o‘rtasida iqtisodiy aloqalardan tashqari, oliy o‘quv yurtlari o‘rtasida hamkorlik, talabalar almashinuvi ham rejalashtirildi.
Xmelniskiy shahri meri Aleksandr Simchishin va Namangan shahri hokimi G‘ofurjon Jamalov ikki hudud o‘rtasidagi “Birodar shahar” kelishuvini imzoladi.
Marosimda Ukrainaning O‘zbekistondagi favqulodda va muxtor elchisi Nikolay Doroshenko ishtirok etdi.
Izoh (0)