Devid Jons ismli amerikalik bloger o‘zining YouTube’dagi kanaliga karton qog‘ozidan Lamborghini Aventador nusxasini yaratish jarayoni tasvirlangan 17 daqiqali videoni joylashtirdi. Erkak mashinaning ushbu nusxasini auksion orqali 10,4 ming dollarga sotishga muvaffaq bo‘lgan, deb yozadi Motor.
Superkar nusxasini yaratish uchun bloger maishiy texnikalarni qadoqlashda ishlatiladigan oddiy kartondan foydalangan. Erkak yog‘och ramadan mashina asosi sifatida foydalangan, g‘ildiraklari velosipeddan olingan, o‘rindiq o‘rniga plastik stul o‘rnatilgan, shuningdek, Lamborghini ko‘tariladigan eshiklar, oyna va rul boshqaruviga ega bo‘lgan. Blogerlar qog‘oz Aventador’ni yig‘ish qo‘llanmasini internetdan olgan va uning o‘lchamini 5 barobarga kattalashtirgan.
Bir oy davom etgan mehnat natijasida superkarning deyarli to‘liq o‘lchamli karton nusxasini yaratishga muvaffaq bo‘lingan. Modelning o‘lchamlari: uzunligi 3780, eni 1650 millimetr. Loyiha mualliflari o‘z mahsulotini 50 dollarga sotmoqchi bo‘lgan. Biroq savdolar davomida karton Aventador narxi 10,4 ming dollarga chiqib ketgan. O‘zbekistonda bu pulga yangi Cobalt avtomobilini xarid qilish mumkin.
Avvalroq vyetnamlik blogerlar ham karton qog‘ozdan Lamborghini Aventador yasagani to‘g‘risida xabar berilgandi. Bu kabi noodatiy mashinani yaratish uchun besh oy va 500 dollarga yaqin mablag‘ sarflangan.
Izoh (0)