Prezident tanqid qilgan Dehqonobod hokimining birinchi o‘rinbosari o‘rnida yangi o‘rinbosar ish boshladi

Qashqadaryo viloyatining Dehqonobod tumani hokimiga birinchi o‘rinbosar tayinlandi, deya xabar berdi “Daryo” muxbiri.

Ta’kidlanishicha, mazkur lavozimga 2018-yildan beri tuman moliya bo‘limi boshlig‘i vazifasini bajarib kelgan Ulug‘bek Usmonov munosib ko‘rilgan.

Ulug‘bek Usmonov 1982-yil Deqonobod tumanida tug‘ilgan bo‘lib, 2004-yil Qarshi davlat universitetini, 2015-yil O‘zbekiston Respublikasi Bank-moliya akademiyasini tamomlagan.

U mehnat faoliyati davomida “Toshkent fuqaro inshootlari va suv ta’minoti distansiyasi”da, Dehqonobod tuman mudofaa ishlari bo‘limida, tuman moliya bo‘limida, Dehqonobod tuman hokimligi moliya bo‘limi budjet ijrosi hisobi va hisoboti sektori mudiri-bosh hisobchisi lavozimlarida faoliyat yuritgan.

Eslatib o‘tamiz, Ulug‘ubek Usmonovdan oldin mazkur vazifani Abdumajid Eshatov bajargan bo‘lib, u Prezident tanqidiga uchrab, vazifasidan olingan edi.