Shimoliy Koreya rahbari Kim Chen In dunyoda koronavirusning keng tarqalayotganidan xavotirda ekani sababli o‘zining ommaviy tadbirlardagi ishtirokini qisqartirdi. Bu haqda ikki Koreyani birlashtirish bo‘yicha vazirlik vakiliga tayanib Yonhap agentligi xabar berdi, deb yozmoqda “Interfaks”.
“2020—2021-yilda koronavirusning tarqalishi munosabati bilan Kim Chen Inning jamoat faoliyatida pasayish tendensiyasi kuzatildi. Uning partiya qurultoyi kabi keng ko‘lamli siyosiy tadbirlarda ishtirok etishi bundan mustasno”, — deb xabar berdi vazirlik vakili jurnalistlarga nomini oshkor qilinmaslik sharti bilan.
Ta’kidlanishicha, yaqinda KXDR rahbari, taxminan, 20 kun davomida jamoatchilik e’tiboridan chetda qoldi.
Agentlikka xabar bergan vakilning so‘zlariga ko‘ra, davlat rahbarining oxirgi paytlarda jamoatchilikka ko‘rinish bermaganining sababini aytishga hali erta, lekin vazirlik tegishli vaziyatlarni diqqat bilan kuzatib boradi.
Eslatib o‘tamiz, 2020-yilning may oyida CNN telekanali AQShning KXDR yetakchisi Kim Chen Inning sog‘lig‘i jarrohlik amaliyotidan so‘ng yomonlashgani to‘g‘risidagi razvedka ma’lumotlarini o‘rganayotganini ma’lum qilgandi. Daily NK’ning yozishicha, Kim Chen Inda 12-aprel kuni yurak-qon tomir tizimiga bog‘liq jarrohlik amaliyoti o‘tkazilgan. Biroq AQSh sobiq prezidenti Donald Tramp Kim Chen Inning sog‘lig‘i yomonlashgani to‘g‘risidagi ma’lumotlar xato ekanligini bildirib, CNN’ga doim ham ishonavermasligini aytgan. 27-aprel kuni Janubiy Koreya prezidenti maslahatchisi KXDR yetakchisi soppa-sog‘ ekanligini ma’lum qilgan.
Avvalroq Kim Chen In mamlakatdagi vaziyat har qachongidan ham yomonroq ekanini tan olgan edi. Shimoliy Koreya rahbari partiyaning quyi sinflarini aniqlanmagan “kamchiliklar” uchun tanqid qildi va partiya barqaror hamda sog‘lom rivojlanishi uchun ularni zudlik bilan tuzatishga chaqirdi.
Fevral oyida Kim Chen In hukumatni mamlakatdagi iqtisodiy tanazzullar uchun tanqid qilgan va bosh iqtisodchini iqtisodiyotni saqlab qolish uchun yangi g‘oyalar taklif qilmagani sababli ishdan bo‘shatgan edi.
Izoh (0)