Ben Geskin ismli bloger Xiaomi Mi 11 Ultra smartfonidagi “super oy” rejimining noodatiy ishlash prinsipiga e’tibor qaratdi. Ma’lum bo‘lishicha, smartfon tomonidan olingan yakuniy surat sifatli ko‘rinishi uchun Oyning boshqa tasviridan foydalanadi, deb yozmoqda Hi-Tech.Mail.ru.

Foto: Hi-Tech.Mail.ru

Aftidan Oyni suratga olish rejimida smartfon kadrda Yerning tabiiy yo‘ldoshini taniydi va suratni boshqasiga almashtiradi — u hatto haqiqiysiga u qadar o‘xshash bo‘lmasa ham. Tasvir saqlangach, uning qanchalik o‘zgarishini quyidagi video orqali ko‘rish mumkin.

Zamonaviy smartfonlar nafaqat yangi matritsa va optika texnologiyalari, balki dasturiy jihatdan qayta ishlash hisobiga ham yaxshiroq suratga olishni boshladi. Ammo odatda ular kamera sensoridan olingan ma’lumotlar bilan ishlaydi, bu yerda esa smartfon Oyning boshqa suratini original surat ustiga qo‘yadi.

Oyni suratga olishga mo‘ljallangan maxsus rejimlar ko‘plab zamonaviy Android smartfonlarga paydo bo‘lishni boshlagan. Zamonaviy mobil kameralarning optik kombinatsiyasi va dasturiy zumi tabiiy yo‘ldosh yuzasiga yaqinlashish uchun yetarli.

Eslatib o‘tamiz, Xiaomi Mi 11 Pro va 11 Ultra kompaniya tomonidan mart oxirida o‘tkazilgan keng ko‘lamli taqdimotda namoyish etilgandi. Smartfonlar kremniy-kislorodli anodga ega yangi turdagi akkumulyator hamda Xiaomi tarixida birinchi bor IP68 standarti bilan jihozlangan.