“O‘zbekfilm” rahbari Fotih Jalolov “O‘zbekkino” rahbari Firdavs Abduxoliqov ustidan 109 kishi tomonidan yozilgan shikoyat xatiga imzo chekkani uchun jamoadoshlari fevraldan beri oyliksiz ishlayotgani haqida so‘zlab berdi.
“Bir hafta-o‘n kundan beri kollektivning ko‘ziga qaray olmay qoldim. Biror ishni qilinglar, deyishga ham tilim bormaydi. Bu yerda 140 ga yaqin kishi ishlaydi. O‘tgan yili bir amallab chidadik. Bu yil ham chidashyapti. Lekin ularning har birining oilasi bor. Fevral oyidan beri oylik olishmaydi. ‘O‘zbekfilm’ davlat buyurtmasini qiladigan joy. Film bo‘lsa, pul tushadi. Umumiy studiya xarajatlaridan xodimlarga oylik beriladi. Bu dargoh ‘O‘zbekkino’ning tizimidagi dargoh. Tizimga bee’tibor bo‘lish, o‘z farzandini o‘zi ko‘mishi yaxshilikka olib kelmaydi. Shu paytgacha bunaqa holatni ko‘rmaganman. Buning, ya’ni xodimlarimning oylik ololmayotganining asosiy sababchisi menman.
Rahbar bilan oxirgi gaplashganimizda u yuzimga siz mening ustimdan xat yozgansiz, xatga qo‘l qo‘ygansiz, dedi. Bu ishga bir yildan oshdi. Xatga 109 kishi qo‘l qo‘ygan. Ularni men majburlab, qo‘l qo‘ydirmaganman. O‘z xohishlari bilan qo‘l qo‘ygan. Rahbarni o‘g‘riga chiqarmaganmiz xatda. Shu xodimlarni sal e’tiborga olaylik, degan maqsadda xat yozilgan. Xo‘p, men xat yozganman, qo‘l qo‘yganman, shuning uchun xodimlarga oylik berilmayaptimi, desam, uni o‘zingiz o‘ylab ko‘ring. ‘O‘zbekfilm’ning 70 nafar xodimi ham qo‘l qo‘ygan, siz ularni uyma-uy yurib, qo‘l qo‘ydirgansiz, bosh bo‘lgansiz, shuning uchun ‘O‘zbekfilm’ga hech narsa yo‘q, dedi”, — deydi Fotih Jalolov.
Shuningdek, Fotih Jalolov ushbu vaziyatga yechim sifatida ishdan ketishni rejalashtirayotgani haqida ham gapirdi.
“Nima uchun meni deb butun ‘O‘zbekfilm’ qora kunlarni boshdan kechirishi kerak? Bitta men ekanman, bu yerdan ketganim yaxshimasmi, degan fikr keldi. Bugun arizamni yozdim. Bitta men uchun butun boshli ‘O‘zbekfilm’ aziyat chekishi kerak emas. Aktyorligim bor, rejissorligim bor, juda bo‘lmasa, fermer xo‘jaligim bor. Agar men ketsam, shu yerda ish yaxshilanib ketsa, men faqat xursand bo‘laman”, — deydi so‘zlarini davom ettirib Fotih Jalolov.
Ma’lumot uchun, 2020-yilning aprel oyida O‘zbekiston kinematografiya sohasi arboblari, mutaxassislari, rejissorlar va aktyorlar “O‘zbekkino” direktori Firdavs Abduxoliqov ustidan bosh vazir Abdulla Aripovga shikoyat qilgan edi.
Izoh (0)