Yaqin besh yil ichida 90 foiz ehtimol bilan kuzatuvlar tarixidagi eng iliq yil qayd etilishi kutilmoqda. Bu haqda BMTning ixtisoslashgan Jahon meteorologiya tashkiloti (JMT) xabar berdi.
“Yaqin besh yilning eng kamida bir yili shu paytgacha eng issiq hisoblangan 2016-yil ko‘rsatkichlaridan oshib ketish ehtimoli 90 foizni tashkil qiladi”, — deyiladi xabarda.
JMT prognozlariga ko‘ra, ushbu besh yillikning har yilida quruqlik va dengiz sathidagi o‘rtacha harorat sanoatgacha bo‘lgan davrning harorat ko‘rsatkichlaridan eng kamida bir darajaga yuqori bo‘ladi. Eng issiq yilda 40 foiz ehtimol bilan, harorat sanoatgacha bo‘lgan davrga taqqoslaganda 1,5 darajaga oshib ketishi mumkin.
2020-yilda o‘rtacha harorat sanoatgacha bo‘lgan davrning asosiy ko‘rsatkichlaridan 1,2 darajaga oshdi va tarixda kuzatilgan uchta eng issiq yildan biri sifatida qayd etildi.
Avvalroq “Rosgidromet”ning Voyeykov nomidagi Bosh geofizika observatoriyasi direktori Vladimir Katsov iqlim o‘zgarishi sharoitida Rossiyada haroratning ko‘tarilish darajasi dunyoning o‘rtacha darajasidan yuqori ekanini aytgan edi. Shunday qilib, Rossiyada so‘nggi o‘n yil ichida haroratning o‘sishi 0,51 darajani, dunyo bo‘yicha esa 0,18 darajani tashkil etdi.
Shuningdek, WWF Rossiya “Iqlim va energetika” dasturi direktori Aleksey Kokorin ham dunyo bilan taqqoslaganda Rossiyadagi haroratning ko‘tarilishi haqida gapirdi. Uning so‘zlariga ko‘ra, hozir global isish o‘n yil ichida 0,2 darajani tashkil qilmoqda, lekin Rossiyada bu o‘zgarish ikki barobar tezroq sodir bo‘lmoqda.
Avvalroq Yerning harorati 2020-yilda so‘nggi 3 million yil ichidagi rekord darajaga ko‘tarilgani haqida xabar berilgandi.
Ma’lumot uchun, Kornell universiteti tomonidan AQSh Qishloq xo‘jaligi vazirligi ko‘magida olib borilgan tadqiqotga ko‘ra, iqlim o‘zgarishi oqibatida qishloq xo‘jaligining umumiy milliy mahsuldorligi 1960-yillardan buyon 21 foizga pasaygan. Bunday pasayish so‘nggi yetti yil ichidagi mahsuldorlikning o‘sishini yo‘qotish bilan tengdir, deya ta’kidlaydi olimlar.
Shuningdek, global isish Yerni 35 million yil ortga qaytarishi, 2100-yilga borib yoz fasli yarim yil davom etishi haqida olimlarning prognozlari xabar qilingandi.
Izoh (0)