Keng etakli yubkalar, katta hajmli yenglar, alohida ta’kidlangan bel qismi – ushbu mavsumda “qo‘g‘irchoq” liboslar moda maydoniga kirib keldi. Bu kabi liboslarda har bir qiz o‘zini malika kabi his qiladi. Quyida yozgi ko‘rinishga mos keladigan 10 ta zamonaviy libos bilan tanishish mumkin.
Chiroq shaklidagi yeng, katta bichimdagi yoqa, shaklini yaxshi saqlaydigan mato – bu kiyim kundalik va kechki uchrashuvlarga juda mos keladi. Ushbu libosni “meri jeyn” poyabzallari, krossovka yoki nafis sandallar bilan kiyish mumkin. Aksessuar sifatida naqshli hamyon va kashta tikilgan kichik sumkani tanlash tavsiya etiladi.
Mayda naqshli chiroyli qo‘g‘irchoq libosi belbog‘ tufayli ham belga alohida urg‘u beradi va bu kabi yoqalar bo‘yni vizual ravishda uzaytirishga yordam beradi. Ushbu ko‘ylakni yopiq baletka va kichkina to‘qilgan sumka bilan to‘ldirish mumkin.
Kechki tadbir – bitiruv kechasi, to‘y, tug‘ilgan kun uchun mos keladi. Nozik siyohrang va bejirim bezaklar, albatta, har qanday qizga ko‘rk bag‘ishlaydi.
Kundalik kiyish uchun och feruzarang midi uzunlikdagi libosni tanlash mumkin. Libosni jigarrang charm sandallar, sharf va savatsimon sumka bilan kiyish tavsiya etiladi.
Bel qismi yuqoridan bichilgan qora libos oq rangdagi yengil oyoq kiyimlar bilan ajoyib uyg‘unlikni hosil qiladi. Bundan tashqari, aksessuar sifatida ko‘zoynak va soch tasmasini qo‘shish mumkin.
Orqa tomoni bog‘lanadigan xira pushti libos chiroyli romantik qiyofa yaratishga yordam beradi. Obrazni nozik poshnali tufli va ziraklar bilan boyitish mumkin.
Baland bo‘yli, uzun oyoq egalari uchun ushbu ko‘ylak ayni muddao. Unga eng yaxshi qo‘shimchalar – shlyapa va tutqichi kichik sumkadir.
Oddiy, ammo dramatik narsalarni izlayotganlar uchun etakli yubka va yenglari shishirilgan ko‘ylak tavsiya etiladi. Baletka, krossovka va sandallar bilan uyg‘unlashgan libos obrazni yanada boyitadi.
Ushbu model yozgi kechalar uchun yechim hisoblanadi. Unga oq rangdagi oyoq kiyim va zargarlik buyumlarni qo‘shish bilan yangi ko‘rinishni hosil qilish mumkin.
Izoh (0)