YouTube 1-iyundan servisdagi barcha roliklarga prerol deb ataluvchi qisqa video va boshqa turdagi reklamalar joylashtirishini rasman ma’lum qildi, deb xabar beradi Hi-Tech.Mail.ru.
Foto: Pixabay
Avvallari rolik mualliflarida reklama “vstavkalari”ni rolik avvali va uning ichida monetizatsiya ko‘rinishida yoqish imkoniyati bo‘lgan. Endilikda reklama monetizatsiyaga ulanmagan yoki boshqa yo‘llar bilan pul ishlash maqsadida u rad etilgan bo‘lsa ham, ko‘rsatiladi. Reklama har qanday holatda namoyish etiladi.
Alphabet xolding tarkibiga kiruvchi Google YouTube servisi paydo bo‘lganidan buyon daromad keltirish yoki keltirmasligini ma’lum qilmagan. 2020-yilda kompaniya birinchi bor videoxosting ko‘rgan foydani e’lon qildi — bu yiliga 15 milliard dollar (Alphabet ko‘rgan foydaning 10 foizi).
2015-yilda The Wall Street Journal gazetasida YouTube’ning moliyaviy holati haqida katta maqola chiqqan edi — o‘shanda Google uchun ushbu loyiha biroz zarar keltirgan. Vaziyat shundan buyon o‘zgargan yoki o‘zgarmagani noma’lum.
Taxminlarga ko‘ra, YouTube hamon zarariga ishlamoqda yoki “nolga kirish” chegarasida. Barcha roliklarga reklama qo‘yish qarori esa kompaniyaning vaziyatni o‘zgartirishga bo‘lgan intilishini ifodalaydi. Shu bilan birga, servis qo‘shimcha ravishda foydalanuvchilarga YouTube Premium’ga pulli obuna bo‘lishni taklif etadi. Pulli obuna orqali roliklarni yuklab olish va reklamasiz tomosha qilish mumkin.
