Kongo demokratik respublikasi sharqida joylashgan Niragongo vulqoni otilishi oqibatida halok bo‘lganlarning soni 15 nafarga yetdi. Bu haqda mahalliy Actualite nashri xabar bergan.

Foto: Getty Images

Ma’lumotlarga ko‘ra 9 kishi Goma shahridan odamlarni evakuatsiya qilish vaqtida yuz bergan YTHda halok bo‘lgan. Shimoliy Kivu hududidagi yo‘l o‘rtasida odamlarni olib ketayotgan yuk mashinasi aylanib ketishi oqibatida avtohalokat sodir bo‘lgan.

Yana to‘rt nafar qurbon vulqon otilayotgan vaqtda Munzenze qamoqxonasidan qochishga uringan mahbuslar. Halok bo‘lgan yana ikki nafar odam haqida ma’lumotlar berilmagan.

Shimoliy Kivu gubernatori Kongo armiyasi va milliy politsiyaga Goma shahri xavfsizligini ta’minlash, sarosima vaqtda o‘g‘riliklar, bezorilik va evakuatsiya vaqtida bosqinchilik harakatlarining sodir bo‘lmasligini nazoratga olishni buyurgan.

Vulqonning faolligi to‘xtaganidan keyin odamlar asta-sekin o‘z uylariga qaytishni boshlagan. Tabiiy ofat oqibatida vulqon uyumidan shimoli-sharqda joylashgan Goma shahri atrofidagi hududlarga zarar yetgan.

Avvalroq mamlakat hukumati Niragongo vulqoni faollashuvi oqibatdia besh kishi halok bo‘lganini xabar qilgan. Xabarda Goma shahrida yashovchi fuqarolarning evakuatsiya vaqtida halok bo‘lgani aytilgandi.

Niragongo 22-may kuni oqshomda harakatga kelgan va ertasi kuni tongda otilishdan to‘xtagan. Lava oqimi aeroport chegarasidan 50 metr uzoqlikgacha yetib borgan.

Avval may oyi boshida Islandiyada zilzilalar natijasida harakatga kelgan vulqon faollashgani,  aprelda esa Karib dengizining Sent-Vinsen orolida La-Sufriyer vulqoni harakatga kelgani, u yerdan faqat emlanganlar evakuatsiya qilingani haqida xabarlar berilgandi.