Hindiston hukumati barcha ijtimoiy tarmoqlarga koronavirusning “hindcha” shtammi bilan bog‘liq yoki uning mavjudligini nazarda tutuvchi barcha kontentlarni o‘chirib tashlash iltimosi bilan murojaat qildi, deb yozmoqda “RIA Novosti”.
Ma’lumotlarga ko‘ra, Hindiston Elektronika va axborot texnologiyalari vazirligiga yo‘llangan maktubda Jahon sog‘liqni saqlash tashkiloti (JSST) koronavirusning hech bir variantini rasman nomlamagani ta’kidlangan.
Avvalroq olimlar Hindistonning G‘arbiy Bengaliya shtatida koronavirusning yangi B.1.618 shtammini aniqladi. Hindistonlik epidemiologiya professori Madhukar Payning so‘zlariga ko‘ra, koronavirusning ushbu yangi shtammi uch karra mutatsiyaga uchragan variant bo‘lib, u tezroq tarqalish xususiyatiga ega. Yangi B.1.618 shtammi Hindistonda aniqlangan koronavirusning ikkinchi chizig‘i bo‘lib, birinchi B.1.617 shtammi koronavirusning ikki karra mutatsiyaga uchragan varianti sifatida ro‘yxatga olingan.
Hindiston hozirgacha koronavirus bilan kasallanish soni bo‘yicha dunyoda ikkinchi o‘rinni band qilib turibdi.
Hindistonda COVID-pandemiya fonida odamlarning xavfli zamburug‘larga chalinish holatlari ko‘paydi. Hindistonda koronavirus tarqalishining ikkilamchi ta’siri sifatida paydo bo‘lgan qora zamburug‘ epidemiyasi fonida yana bir zamburug‘ kasalligi aniqlandi, u mamlakatda oq zamburug‘ deb ataladi.
Izoh (0)