“Har qanday holatda ham men kelinchak tomondaman. Ammo mana shu voqea ortidan 7 oila ham buzilmasligi kerak”— Andijon tumani hokimi maslahatchisi

Andijonda besh nafar erkak dala shiyponida 18 yoshli kelinni zo‘rlagani, kelinning yaqinlari qonunbuzarlarga chora ko‘rishni so‘rayotgani xabar berilgandi. Holat yuzasidan viloyat prokuraturasi bayonot berib, tegishli ekspertizalar tayinlangani, tergovga qadar tekshiruv harakatlari davom etayotganini ma’lum qilgan edi. Bosh prokuratura matbuot xizmati holat bo‘yicha qo‘shimcha ma’lumotlarni taqdim qildi.

“Daryo” muxbiri Andijon tumani hokimining Oila va xotin-qizlar masalalari bo‘yicha maslahatchisi Mavluda Yusupova bilan bog‘lanib, kelinchakning bugungi kundagi holati haqida ma’lumot oldi.

“O‘zingizga ma’lum so‘nggi paytlarda ijtimoiy tarmoqlar orqali ayollarga nisbatan zo‘ravonlik holatlari ko‘payib ketgani haqida xabar berilmoqda. Eng achinarlisi haligacha erkaklarning ayollarga nisbatan past nazar bilan qarash holatlari uchrab turibdi. Har qanday holatda ham men kelinchak tomondaman. Ammo mana shu voqea ortidan yetti oilaning taqdiri qil ustida turibdi. Nega bunday deyapman. Chunki jinoyat sodir qilgan olti nafar erkakning ham oilasi, farzandlari, o‘tish yoshidagi qizlari bor. Men maslahatchi sifatida bitta jabrlanuvchining emas, erkaklarning oilasi bilan ham shug‘ullanishga majburman. Shu sababli tumandagi kuchli psixologlarning olti nafarini ushbu oilalarga biriktirdik. Negaki, bolalarning birortasiga kimdir ‘sening otang bunday qilib qo‘yibdi’ desa ularga salbiy ta’sir qilishi mumkin. Natijada suitsid yoki boshqa holatlar yuz berishi ehtimoli kam emas. Ayollarning oriyati bor, o‘z joniga qasd qilib qo‘yishi mumkin. Jinoyatchi bo‘lsa-da, o‘sha erkaklarning oilasidagi ayollar ham ayol ekanini unutmasligimiz lozim.

Ayolning holati tuman hokimligi va boshqa mutasaddilarning doimiy nazoratida. U hozirda depressiya holatida. Shuning uchun aytayotgan gaplari bir-biriga to‘g‘ri kelmasligi aniq. Ayni paytda nafaqat shifokorlar, balki psixologlar ham ishlamoqda.

Bir narsani qayd etish lozim, tarmoqlarda homila tushgani haqida ma’lumot tarqalgan edi. Aksincha, homila joyida. Hech qanday xavf-xatar yo‘q. Normal holatda rivojlanishda davom etmoqda. Endi faqat qizning psixologik holatini yaxshilash qoldi, xolos. Qiz voqeani eslagan sari depressiyaga tushib qolyapti. Ishtahasi yo‘qolgan. Natijada kundan kunga vazn tashlayapti. Bu esa homilaga ta’sir qilishi tabiiy. Bundan havotirdamiz. Shu sababli ayni paytda qiz va uning onasi alohida xonaga joylashtirilgan. Holatni shaxsan o‘zim doimiy nazorat qilib turibman. Jinoyatga keladigan bo‘lsak, jinoyatchilar kimlar bu tergov va sud jarayonlarida aniqlanidagan narsa. Buni vaqt ko‘rsatadi”, — deydi Mavluda Yusupova.

Eslatib o‘tamiz, mudhish hodisa Senatning Xotin-qizlar va gender tenglik masalalari qo‘mitasi tomonidan nazoratga olingani, viloyat hokimligi mazkur jinoyatni sodir etgan jinoyatchilar o‘z qilmishlari uchun qonun oldida, albatta, javob berishi haqida xabar berilgan edi. Keyinroq Mahalla va oilani qo‘llab-quvvatlash vazirligi vazirning shaxsiy nazoratiga olingani, hozirga qadar viloyat IIB rahbariyati bilan voqea tafsilotlari bo‘yicha doimiy muloqot olib borilayotgani ta’kidlangandi. Ushbu jinoyat ishini ichki ishlar vaziri shaxsan nazoratga olgandi.