Toshkent shahri Chilonzor tumanida joylashgan Adiblar xiyoboniga tashrif buyurganlarning buyumlarini talon-toroj qilgan to‘rt nafar shaxs qo‘lga olindi. Ularning biri 16 yoshli qiz. Bu haqda Tergov departamenti xabar qildi.
Ma’lum qilinishicha, 2021-yilning 16-may kuni tungi soat 22:00 larda bir nechta noma’lum shaxslar Toshkent shahar Chilonzor tumanida joylashgan Adiblar xiyobonidagi o‘rindiqda o‘tirgan fuqarolar 19 yoshli A.O. hamda R.M. ismli qizning yoniga kelib, A.O. ismli yigitning faol qarshilik qilishiga qaramay, uning cho‘ntagidagi hamyonini ochiqdan ochiq talon-toroj qilib, hodisa joyidan qochayotganlarida ushbu hududda xizmat olib borayotgan qo‘riqlash xizmati xodimlari tomonidan qo‘lga olingan.
Tergovga qadar tekshiruv harakatlari davomida ushbu jinoyatni 20 yoshli I.D., 22 yoshli R.A., 19 yoshli O.M. ismli yigitlar va 16 yoshli X.Sh. ismli qiz sodir qilganligi aniqlangan.
Mazkur holat yuzasidan Chilonzor tumani bo‘yicha IIO FMB huzuridagi tergov bo‘linmasi tomonidan Jinoyat kodeksining 166-moddasi (talonchilik) bilan jinoyat ishi qo‘zg‘atilgan.
Tergov harakatlari jarayonida ushbu gumon qilinuvchi shaxslar 2021-yilning 16-may kuni soat 12:00 larda mazkur Adiblar xiyobonida bo‘lgan fuqaro 22 yoshli T.Sh. ismli yigit va uning tanishi 16 yoshli M.A. ismli qizning yoniga kelib, ularga tegishli 2 500 000 so‘mlik Samsung A51 va narxi 2 000 000 so‘mlik Samsung A02S rusumli telefon apparatlarini ochiqdan ochiq talon-toroj qilganligi aniqlangan.
Jinoyat ishi doirasida I.D., R.A., O.M. va X.Sh.ning boshqa jinoyatlarga aloqadorliklari aniqlanib, huquqiy baho berilishi ta’minlanishi ma’lum qilingan.
Bundan avval Yashnobodda 17 yoshli yigit 61 yoshli ayolning telefoni va 1,2 million so‘m pullarini talon-toroj qilgani, Andijonda ikki shaxsga zo‘rlik ishlatib, puli va telefonini olib qo‘ygan ayol ushlangani hamda Buxoroda o‘ziga notanish fuqaroga spirtli ichimlik ichishni taklif qilib, uni do‘pposlagan va to‘nagan shaxsga sud hukmi o‘qilgani haqida xabar berilgandi.
Izoh (0)