Hindistonning g‘arbidagi Tauktaye sikloni oqibatida yuzdan ortiq odam hayotdan ko‘z yumdi. Bu haqda dpa international xabar berdi.
Mumbay sohillarida joylashgan, bortida 261 kishi bo‘lgan kema cho‘kib ketdi. Hindiston floti 37 kishining halok bo‘lganini, 38 kishining bedarak yo‘qolganini, qolganlarning esa qutqarib olinganini tasdiqladi.
Hindiston sohillaridagi binolar va daraxtlarning qulashi natijasida Gujarot shtatida 53 nafar, Maxarashtra shtatida 18 nafar, Goa, Karnataka va Kerala shtatlarida 10 nafar odam halok bo‘ldi.
Bundan tashqari, Gujarotda taxminan 16,5 mingta uy zarar ko‘rdi, hukumat 200 ming aholini evakuatsiya qildi.
Tauktaye sikloni shamol tezligini soatiga 210 kilometrgacha chiqardi, bu bo‘ronning uchinchi toifasi bo‘lib, IMD (India Meteorological Department — Hindiston Meteorologiya Boshqarmasi) supersiklon toifasidan atigi bir daraja past hisoblanadi.
Eslatib o‘tamiz, Hindistondagi siklon ketma-ket to‘rtinchi kun davom etmoqda. Siklon yil boshidan buyon sodir bo‘lgan eng kuchlisi ekani e’tirof etildi. Ba’zi hududlar noqulay ob-havo sababli elektr energiyasidan uzilib qoldi. Qutqaruvchilar yo‘llarni qulagan daraxtlardan tozalamoqda.
Avvalroq Hindistonning Bixar shtatida Ganga daryosidan COVID-19 tufayli vafot etgani taxmin qilinayotgan kamida o‘ttiz kishining jasadi topilgani haqida xabar berilgandi. Hindiston hukumati o‘liklarning suvga noqonuniy ravishda tashlanishining oldini olish maqsadida Ganga daryosiga to‘rlar o‘rnatdi.
Izoh (0)