Apple xodimi Maykl Shmid kompaniya Fortnite onlayn o‘yini ortidan kamida 100 million dollar ishlab topganini ma’lum qildi. Ushbu ma’lumotlar Apple hamda Epic Games o‘rtasidagi antimonopol sud mojarolari vaqtida aniqlangan, deb xabar beradi IXBT.
App Store’dagi biznesning rivojlanishiga mas’ul bo‘lgan Shmid Oklend federal sudida so‘roq qilindi. U o‘yin ortidan kelgan daromad 200 million dollardan oshganini ma’lum qilishdan bosh tortib, bu kabi ma’lumot bilan bo‘lishish noo‘rin ekanligini ta’kidlagan.
Fortnite App Store’da 2018-yilda ishga tushgan, 2020-yilda esa Apple dasturchilar o‘zlarining to‘lov tizimini joriy etishga uringani sabab uni o‘chirib tashlagan edi. Manbaning yozishicha, Apple’ning bu boradagi daromadi ancha ko‘p bo‘lishi mumkin. Sensor Tower tahliliy kompaniyasining o‘tgan yilgi ma’lumotlariga ko‘ra, foydalanuvchilar Apple App Store’dagi Fortnite’ga qariyb 1,2 milliard dollar sarflagan, bu esa Apple’ga 354 million dollarga yaqin daromad olib kelgan.
Maykl Shmidning qo‘shimcha qilishicha, Apple so‘nggi 11 oy ichida Fortnite’ning App Store’dagi marketingi uchun 1 million dollar sarflagan. Epic Games yuristi Loren Moskovits marketing va daromad munosabatlarini “foydali bitim” deya ta’riflagan.
Sensor Tower ma’lumotlariga ko‘ra, 2020-yilning o‘zida Kupertinodagi kompaniya App Store’dagi komissiyalar ortidan 22 milliard dollarga yaqin daromad olgan. 2020-moliyaviy yil davomida Apple kompaniyasining umumiy daromadi 275 milliard dollardan oshgan.
Shmidni so‘roq qilgan Epic Games Apple o‘zining App Store’si orqali haddan ortiq ko‘p daromad ko‘rayotganini isbotlab berishga uringan.
Izoh (0)