Noqonuniy migratsiya va odam savdosiga qarshi kurashish bo‘limi va Bo‘ka tumani IIB tezkor xodimlari tomonidan navbatdagi odam savdosi bilan bog‘liq holatga chek qo‘yildi, deb xabar bermoqda Toshkent viloyati IIBB matbuot xizmati.
Qayd etilishicha, 2021-yilning 13-may kuni o‘tkazilgan tezkor tadbir davomida Bo‘ka shahrida yashovchi er-xotin — 1989-yilda tug‘ilgan Z. va 1995-yilda tug‘ilgan K. (to‘rt nafar farzandi bor, ism-shariflar o‘zgartirilgan) ismli shaxslar oldindan jinoiy til biriktirib, Toshkent viloyatida yashovchi moddiy jihatdan qiynalgan ayollarga, xususan, 1999-yilda tug‘ilgan M. va 1994-yilda tug‘ilgan M.ga Turkiyada mo‘may daromad to‘lanadigan ish topib berishini, yordam sifatida yo‘l xarajatlarini o‘z hisobidan qoplab berishlarini va’da qiladi.
Dastlabki surishtiruvlar davomida ularning maqsadi ayollarni Turkiya davlatiga fohishalik uchun yuborish ekanligi, Z.ning turmush o‘rtog‘i K. 2021-yil aprel oyida eri bilan oldindan kelishgan holda Turkiya davlatiga jo‘nab ketganligi va turmush o‘rtog‘i olib borishi kerak bo‘lgan ayollarni kutib olishi rejalashtirilgani aniqlandi.
Z. ayollarni Islom Karimov nomidagi Toshkent xalqaro aeroportidan Toshkent—Istanbul aviareysi orqali Turkiyaga olib ketayotgan vaqtida viloyat IIBB tezkor xodimlari tomonidan ushlandi.
Mazkur holat yuzasidan Bo‘ka tumani IIB huzuridagi tergov bo‘limi tomonidan Jinoyat kodeksining 25, 135-moddasi (odam savdosi) bilan jinoyat ishi qo‘zg‘atildi.
Bundan avval Samarqandda 37 yoshli ayolni 1000 dollar evaziga Turkiyaga fohishalik uchun sotgan erkak ushlangani, Navoiyda 3 yoshli farzandini 60 million so‘mga sotmoqchi bo‘lgan ayol ushlangani hamda Navoiyda fuqaroni fohishalikka yollab, uni Qirg‘iziston orqali Turkiyaga jo‘natmoqchi bo‘lgan ayolga jinoyat ishi qo‘zg‘atilgani haqida xabar berilgandi.
Izoh (0)