AQShning Nyu-York shahri bosh prokuraturasi mamlakat sobiq prezidenti Donald Trampning Trump Organization tashkilotiga unga qarshi olib borilayotgan tergov endi jinoiy tus olganini ma’lum qildi, deb yozmoqda “Interfaks”.
“Biz Trump Organization’ga bizning ushbu tashkilot ustida olib borayotgan tergov ishlarimiz endi oddiy fuqarolik xususiyatiga ega emasligi to‘g‘risida xabar berdik. Hozirda biz Manxetten okrug prokurori bilan Trump Organization’ning faoliyatini jinoiy nuqtai nazardan o‘rganib chiqyapmiz”, — deb xabar berdi Nyu-York bosh prokurori Letitsiya Jeymsning matbuot kotibi Fabyen Levi CNN nashriga.
Nyu-York bosh prokurorining Trump Organization ustidan tekshiruvi 2019-yildan buyon davom etmoqda. Avvalroq Manxetten okrugi prokurori Sayrus Vens Trampning moliyaviy ishlarida shtat qonunlarining ehtimoliy buzilish holatlarini aniqlash maqsadida jinoiy ish qo‘zg‘atganini ma’lum qilgan edi. Vensning idorasi Trampning soliq deklaratsiyasini o‘z ichiga olgan millionlab sahifadan iborat hujjatlarni tekshirmoqda.
Ma’lumot uchun, Nyu-York sudi advokatlik byurosiga sobiq prezident Donald Tramp kompaniyasi faoliyatiga oid barcha hujjatlarni shtat prokuroriga topshirishni buyurgan edi va materiallar 4-fevraldan Letitsiya Jeymsga topshirilgan.
Avvalroq sobiq prezident har qanday qonunbuzarlik holatlarini rad etib, “tergov siyosiy sabablarga asoslangan”ini ta’kidlagan edi. Shuningdek, u Manxetten okrugi prokurorining tergovini siyosiy “jodugar ovi” deb atagan.
Izoh (0)