“Koinot go‘zali” tanlovida 26 yoshli meksikalik dasturchi qiz g‘olib bo‘ldi (foto)

Meksikalik 26 yoshli  dasturiy ta’minot muhandisi va ayollar huquqlari faoli Andrea Meza “Koinot go‘zali” tanlovda g‘oliblikni qo‘lga kiritdi.

2021-yil 16-may kuni Amerikaning Florida shtatida “Koinot go‘zali” tanlovining tantanali marosimi bo‘lib o‘tdi. Ushbu tanlov 2020-yil boshqa ko‘plab mukofotlar singari pandemiya sababli qoldirilgan edi.

“Koinot go‘zali” 69-marosimi bu safar barcha epidemiologik xavfsizlik standartlariga rioya qilingan holda bo‘lib o‘tdi. Tanlovda ishtirok etgan 74 nafar qiz orasidan g‘oliblik Meksika vakili Andrea Mezaga nasib etdi.

26 yashar meksikalik Meza birinchi o‘rinni egalladi. Undan keyingi o‘rinlar braziliyalik Juliya Gama hamda perulik Yanik Matsetaga nasib etdi. “Rossiya go‘zali-2019” unvoniga erishgan 20 yoshli Alina Sanko esa yarim finalga ham yetib bormadi.

Shunisi e’tiborga loyiqki, Andrea Meza nafaqat “Meksika go‘zali-2017”, balki u ayollar huquqi bo‘yicha ham mas’ul va Munitsipal ayollar instituti bilan hamkorlikda ish olib boradi.

Ma’lumotlarga ko‘ra, aynan Mezaning go‘zallik standartlari va ularni o‘zgartirish haqidagi nutqi tanlovda g‘olib bo‘lishiga sabab bo‘lgan. Tanlovda hakamlar hay’atining a’zolari ayollardan tashkil topgan bo‘lib, ular 1997-yilda g‘olib bo‘lgan amerikalik Bruk Li va 2006-yilgi g‘oliba Zuleyka Riveradir.

“Koinot go‘zali” tanlovida Andreaning yutib chiqishi Meksika uchun birinchi g‘oliblik hisoblanadi.

Tanlov g‘olibasiga tojni undan avvalgi “Koinot go‘zali” janubiy afrikalik Zozibini Tunzi topshirdi. Zozibini koronavirus cheklovlari munosabati bilan ushbu unvonga boshqalarga qaraganda uzoqroq muddat egalik qildi.

Meza go‘zallik tojini kiyganida niqobdagi boshqa barcha ishtirokchilar uni tabriklash uchun quchoqlashga shoshildi. Shuningdek, koronavirus tufayli tanlovdan Angola, Bangladesh, Misr, Ekvatorial Gvineya, Gruziya, Germaniya, Guam, Keniya, Litva, Mo‘g‘uliston, Namibiya, Yangi Zelandiya, Nigeriya, Sent-Lusiya, Shvetsiya, Tanzaniya, Turkiya va Virjiniya orollari ishtirokchilari butunlay chiqarib yuborildi.

G‘olibning so‘zlariga qaraganda, u o‘z mintaqasida turizmni ommalashtirishga harakat qilmoqda.

Shuningdek, u sportni yaxshi ko‘radi. Bundan tashqari, model va vizajistlik bilan ham shug‘ullanadi hamda o‘zining Andrea Meza Activewear nomli sport brendiga asos solgan.